Ungmennaráðstefnan Ungt fólk og lýðræði

11. júní 2024

Ungmennaráð Ungmennafélags Íslands (UMFÍ) stendur fyrir ungmennaráðstefnunni Ungt fólk og lýðræði dagana 20. – 22. september á Reykjum í Hrútafirði.

Yfirskrift ráðstefnunnar er: Ungt fólk og lýðheilsa.

Eins og nafnið gefur til kynna er ráðstefnan fyrir ungt fólk á aldrinum 15 – 30 ára. Allt ungt fólk á tilsettum aldri er velkomið á ráðstefnuna.

TÆKIFÆRI TIL SKOÐANASKIPTA

Ungt fólk sem hefur komið á ráðstefnuna í gegnum árin segir hana haft afar góð áhrif. Fólk hafi aukið félagslega hæfni sína og lært að vinna með gildi eins og samstöðu, lýðræði og vináttu. Valdefling hafi falist í þátttökunni. Þátttakendur hljóta tækifæri til að myndasér skoðanir og koma þeim á framfæri við jafningja og ráðafólk. Viðburðurinn gefur þannig þátttakendum tækifæri til að hlusta á ólíkar upplifanir og sjónarmið, brjóta ísinn í samskiptum við aðra og fara út fyrir þægindarammann.

FJÖLBREYTT DAGSKRÁ

Dagskráin verður eins og alltaf með fjölbreyttu sniði. Boðið er upp á hópefli og samveru, áhugaverðan fróðleik og uppörvandi og hvetjandi vinnustofur. Fólk úr stjórnmálum og atvinnulífi mætir á ráðstefnuna og fá þátttakendur tækifæri til að byggja upp tengslanet til framtíðar.

Fjöldi þátttakenda er takmarkaður og því þarf að haska sér með skráningu. Fullorðinn einstaklingur þarf að fylgja þátttakendum yngri en 18 ára.

Þátttökugjald er 15.000 kr. fyrir hvern þátttakanda. Innifalið eru ferðir, uppihald og ráðstefnugögn.

Rúta fer frá þjónustumiðstöð UMFÍ í Reykjavík á föstudeginum og til baka á sunnudeginum semþátttakendur eru hvattir til þess að nýta sér. Fyrir þau sem ekki geta nýtt sér rútuna er hægt að sækja um styrk fyrir ferðakostnaði til UMFÍ. Skila þarf inn kvittunum á sérstöku eyðublaði sem sent verður út eftir viðburðinn.

Athygli er vakin á því að viðburðurinn er vímuefnalaus, það sama á við um rafsígarettur og nikótínpúða.

Skráning er hafin og stendur til 11. september.

Smelltu hér til þess að skrá.

Hér er hlekkur á viðburðinn á Facebook: UNGT FÓLK OG LÝÐRÆÐI 2024 | Facebook

Nánari upplýsingar um ráðstefnuna má finna hér : Ungt fólk og lýðræði – Ungmennafélag Íslands

Ný heimasíða

Þessi síða er í vinnslu, endilega látið vita ef það er eitthvað sem betur má fara.

83. Héraðsþing HSH

83. Héraðsþing HSH var haldið á Lýsuhóli þann 11 .apríl s.l. Þingshaldarar í ár voru UMF. Staðarsveit og Golfklúbbur Staðarsveitar. Við þökkum þeim fyrir gott utanumhald og móttökur.

Þingforsetar voru þau Kristján Þórðarson og Ragnhildur Sigurðardóttir og ritarar þingsins voru þær María Alma Valdimarsdóttir og Berglind Long. Þingið gekk vel fyrir sig og mæting þingfulltrúa var mjög góð.

Töluvert margar tillögur voru lagðar fyrir þingið og eiga þingfulltrúar hrós skilið fyrir vel unnin störf. Ný lög HSH voru samþykkt samhljóða með breytingatillögu en fyrst og fremst var verið að uppfæra lögin miðað við tíð og tíma en gömlu lögin voru samþykkt árið 2008. Þá voru tillögur um arðgreiðslu og lottóuppgjör samþykktar samhljóða og skiptingu á afkomu af Landsmóti 50+ samþykktar með breytingatillögu. Þá voru einnig samþykktar samhljóða ýmsar þakkar- og hvatningartillögur.

Viðar Sigurjónsson ávarpaði þingið fyrir hönd ÍSÍ en að auki veitti hann heiðursviðurkenningar. Þeir Bjarni Alexandersson og Gunnar Kristjánsson voru sæmdir Gullmerki ÍSÍ fyrir þeirra störf en þeir voru stofnfélagar í Hestamannafélaginu Snæfelling. Þeir störfuðu báðir ötullega fyrir félagið um langt árabil. Þá var Kristján Ágúst Magnússon sæmdur Silfurmerki ÍSÍ en hann hefur verið virkur í starfi Ungmennafélagsins Eldborgar í mörg ár.

Guðmunda Ólafsdóttir ávarpaði þingið fyrir hönd UMFÍ en að auki veitti hún, ásamt Auði Ingu Þorsteinsdóttur, framkvæmdastjóra UMFÍ heiðursviðurkenningar. Ragnhildur Sigurðardóttir og hjónin Þóra Kristín Magnúsdóttir og Helgi Sigurmonsson voru sæmd starfsmerki UMFÍ. Öll hafa þau verið mjög virk í starfi UMF. Staðarsveitar í mörg ár og unnið þar gríðarlega mikilvægt starf. Að lokum var María Alma Valdimarsdóttir sæmd Gullmerki UMFÍ fyrir hennar störf í þágu UMF. Snæfells. María hefur setið í aðalstjórn félagsins frá árinu 1994 og alltaf boðin og búin til þess að aðstoða.

HSH óskar öllu þessu frábæra fólki til hamingju og þakkar fyrir vel unnin störf.

Að lokum var komið að stjórnarkjöri. Hjörleifur Kristinn Hjörleifsson gaf áfram kost á sér sem formaður HSH og var það samþykkt með lófaklappi. Laufey Bjarnadóttir og Kristfríður Rós Stefánsdóttir, sitjandi stjórnaraðildar, gáfu áfram kost á sér til vinnu í stjórn HSH næstu tvö árin. Var það einnig samþykkt með lófaklappi. Stjórnin mun því starfa óbreytt fram að næsta Héraðsþingi HSH.

Unnið er að endurbættri heimasíðu HSH en hún mun vonandi vera sett í loftið í sumarbyrjun. Þinggerð, ársreikningar og ársskýrsla verða færðar þar inn um leið og síðan er tilbúin. Ársskýrslu HSH má sjá í viðhengi hér á facebook síðunni okkar.

Takk fyrir frábært þing,

f.h. HSH, Gunnhildur Gunnarsdóttir, framkvæmdastjóri.