Firmakeppni Snæfells verður laugardaginn 2. janúar 2010.  Gunnlaugur Smára og Nonni Mæju munu halda utanum lög og reglur keppninnar.  Þátttaka kostar 15.000,- á lið.  Leikmenn liða Iceland express deilda sem og 1.deilda spila ekki með, en allir aðrir hjartanlega velkomnir.

Skinfaxi, blað Ungmennafélags Íslands, fagnar merkum tímamótum í sögu blaðsins um þessar mundir, en 100 ár eru síðan fyrsta blaðið var gefið út. Frá því að fyrsta blaðið var gefið út í október 1909 hefur það verið gefið út óslitið, ekki fallið út einn árgangur, sem að öllum líkindum er einsdæmi um tímaritaútgáfu á Íslandi.

Á þessu tímabili hafa 25 einstaklingar komið að ritstjórn blaðsins en fyrsti ritstjórinn var Helgi Valtýsson kennari við Flensborgarskólann í Hafnarfirði. Skinfaxi kemur út fjórum sinnum á ári.

Þess má geta að 2 af ritstjórum Skinfaxa í gegnum tíðina eru Grundfirðingar, það eru þeir Gunnar Kristjánsson og Guðmundur Gíslason. 

Frá upphafi hefur Skinfaxi verið öflugur málsvari ungmennafélagshreyfingarinnar, sambandsaðilanna og heildarsamtakanna. Markmiðið með útgáfu Skinfaxa hefur verið óbreytt í hundrað ár. Að segja fréttir og vera með frásagnir úr starfi ungmennafélaga og þeim verkefnum sem heildarsamtökin hafa haft forystu um eða unnið í samstarfi við aðra.

U17 ára drengjalandslið Íslands lenti í neðsta sæti NEVZA mótsins í IKAST í Danmörku í morgun þegar liðið lá í valnum gegn Englandi.

Fyrsta hrinan endaði 25-12 en lítið gekk upp hjá íslendingunum í þeirri hrinu. Næsta hrina gekk betur hjá Íslandi og náðu strákarnir að sýna sínar bestu hliðar. Ísland var yfir í hrinunni þar til í lokin að England náði að landa sigri 25-23. Þriðja hrinan fór 25-20 eftir að íslenska liðið hafði saxað verulega á forskot Englands.

England vann þar með sinn fyrsta sigur í mótinu en þeir leika gegn Svíum síðar í dag. Ljóst er að Ísland endar í fimmta og neðsta sæti keppninnar.

Síðasti fundur þessa árs hjá Ungmennaráði UMFÍ var haldinn um helgina. Allir meðlimir ráðsins mættu en oftast er notast við fjarfundabúnað þar sem hópurinn er dreifður um landið og tvær úr hópnum, Auður og Halldóra hafa verið erlendis í haust.

Auður verður áfram í Danmörku þar sem hún starfar sem sjálfboðaliði fyrir ISCA og situr í ungmennaráði samtakanna fyrir hönd UMFÍ. Hún lætur nú af störfum í ungmennaráði UMFÍ þar sem hún hyggst dvelja áfram ytra og mun Hrafnkatla Eiríksdóttir koma í ungmennaráðið strax á nýju ári.

Mörg verkefni eru framundan hjá ráðinu og mikill hugur í hópnum að láta gott af sér leiða.

Pub Quiz nr 8 í kvöld

Í kvöld, þriðjudaginn 22. des. fer fram á Kaffi 59 Pub Quiz nr 8 og er þemað að þessu sinni Grundarfjörður. 

Við hefjum leik kl. 21:00 og aðgangur er aðeins kr. 500 sem rennur óskiptur til Meistaraflokks karla í knattspyrnu.

Gummi Gísla og Gunni Kristjáns hafa verið sveittir undanfarna daga við að semja spurningar fyrir þennan stórfenglega viðburð.

Við hvetjum alla til að mæta með jólaskapið og lyfta sér upp svona rétt fyrir jólin.

Meistaraflokksráð.