Framkvæmdanefnd Landsmóts hestamanna ákvað á fundi sínum í gær að hvika hvergi frá undirbúningi Landsmótsins þrátt fyrir að smitandi hósti gangi nú yfir hrossastofninn hér á landi. "Kynbótasýningum verður fram haldið samkvæmt auglýstri dagskrá. Ef á þarf að halda verða settar á aukakynbótasýningar sem eingöngu verða ætlaðar þeim hrossum sem ekki hafa áður getað mætt vegna veikinda," segir í tilkynningu frá framkvæmdanefnd mótsins sem dýralæknir hrossasjúkdóma hjá Matvælastofnun ritar undir. Þá segir að í lögum og reglum Landssambands hestamannafélaga, grein 6.5, sé heimild til þess að félögin haldi tvær umferðir Landsmótsúrtöku. Hestamannafélögin eru hvött til þess að nýta þetta ákvæði, ef þörf krefur, til að veita sem flestum tækifæri til að afla sér þátttökuréttar á Landsmóti. Þá eru hestamenn hvattir til að gæta að velferð hrossa sinna og mæta ekki með veik hross til keppni eða sýninga.