HSK sækir einnig um ULM 2010

Á stjórnarfundi  Ungmennafélags Íslands sem haldinn var 5. desember sl. var ákveðið að auglýsa að nýju eftir mótshöldurum fyrir Unglingalandsmót UMFÍ árið 2010.

Á umræddum stjórnarfundi hjá UMFÍ var tekið fyrir bréf frá Héraðssambandi  Snæfellsness- og Hnappadalssýslu (HSH) þar sem fram kemur að forsendur til mótshalds í Grundarfirði séu ekki lengur til staðar.

Stjórn UMFÍ samþykkti að auglýsa eftir nýjum mótshaldara vegna Unglinglandsmóts 2010 og er sambandsaðilum UMFÍ gefinn kostur á að óska eftir að taka að sér framkvæmd mótsins. Umsóknarfrestur er til 10. janúar 2010. Stjórn UMFÍ mun ákveða mótsstað á fundi sínum 20 janúar 2010.

Stjórn HSK ákvað á stjórnarfundi í síðustu viku að sækja um að halda mótið í Þorlákshöfn og hefur bæjarráð Sveitarfélagsins Ölfus samþykkt að taka þátt í þessu verkefni með sambandinu, ef af verður.