Fréttir af U17 í blaki

U17 ára drengjalandslið Íslands tapaði fyrir Finnlandi í gær. Eins og við var að búast var finnska liðið aðeins of stór biti fyrir strákana, þrátt fyrir að finnski þjálfarinn notaði varaliðið allan leikinn.

Leiknum lauk með sigri Finna, 3-0 (25-7, 25-11 og 25-6)

Eins og tölurnar gefa til kynna er töluverður munur á liðunum. Í upphafi annarrar hrinu komst liðið þó í 2-0 eftir góða uppgjöf og blokk frá Herði Páli Magnússyni. Í kjölfarið sýndi liðið góðar syrpur og skoruðu nokkuð góð stig. Sóknaraðgerðir Finna voru þó sterkari og þeir unnu hrinuna auðveldlega.

Þriðja hrinan byrjaði afar illa og komust Finnar í 16-1. Undir lokin tóku Andreas og Hörður Páll nokkrar hávarnir og endaði hrinan 25-6 Finnum í vil.

Íslenska liðið mætir Englendingum í lokaleiknum sínum en þeir eru í sömu stöðu og Ísland og hafa tapað öllum sínum leikjum.