Auðvelt hjá Snæfell

Álftanes tók á móti Snæfelli í Subwaybikarnum á Álftanesi. Álftanes leikur í 2. deild. Snæfell átti fyrstu stigin og voru 0-3 yfir í smátíma. Álftanes jafnaði 4-4 en leikur liðanna var stirður fyrst um sinn á meðan drengirnir voru að hitna. Snæfell fór  að sýna yfirburði sína fljótlega og komust í 4-11 og svo 9-28 áður en flautað var út úr fyrsta hluta.

Sean Burton var að spila sinn fyrsta leik fyrir Snæfell og var að fá að finna taktinn eftir aðeins sólarhringsdvöl á klakanum. Allir fengu að spreyta sig hjá Snæfelli og voru flestir í gírnum. Hjá Álftanes voru allir að spila einnig en máttu þeir sín lítils gegn sterku liði Snæfells sem voru komnir í 16-45 þegar seig á annan hluta. Snæfell leiddi í hálfleik 22-59.

Í seinni hálfleik sigu Snæfellingar lengra og lengra og voru yfir 33-88 eftir þriðja hluta. Þeir rufu svo 100 stiga múrinn í stöðunni 43-103. Svenni átti 2 góðar troðslur og átti svo Sean góða sendingu í einhverja loftfimleikatakta Sveins Arnars sem hefði verið svakaleg ef það hefði tekist. Ekki þarf að hafa fleiri orð um þetta en að Kristján Pétur setti lokaflautukörfu og Snæfell vann 49-122.

 Allir spiluð vel og mikið en ekki var unnt að halda utan um tölfræði vegna gríðalegrar skrifinsku sem hefði skapast. En þess má geta að Rafn Jóhannsson stýrði Snæfelli til stórsigurs í sínum fyrsta leik sem þjálfari í fjarveru Inga Þórs sem tók út leikbann og hafði hann á orði að pressa væri kominn á menn eftir svona gríðalega góða frammistöðu.