Frjálsar íþróttir, HSK- Selfoss

Frjálsíþróttaráð HSK hélt haustfund sinn í síðustu viku. Farið var yfir helstu málin sem varða framgang frjálsra íþrótta á sambandssvæðinu.

Tilkynnt var um áframhaldandi ráðningu Ólafs Guðmundssonar íþróttafræðings sem verkefnisstjóra átaksverkefnis ráðsins og fundurinn samþykkti einnig framlagða tillögu um sameiningu keppnisliða HSK og UMF Selfoss á Meistaramótum Frjálsíþróttasambands Íslands.

Samþykkt var á fundinum að liðið skyldi keppa undir nafninu HSK - Selfoss.

Á fundinum var einnig samþykkt áskorun til bæjarstjórnar Árborgar, um að hraða sem mest byggingu frjálsíþróttavallar, þannig að uppbyggingin nýtist sem best við undirbúning frjálsíþróttafólks fyrir landsmót UMFÍ 2013, sem verður einmitt haldið á Selfossi.

Góður andi ríkti á fundinum og greinilegt að sókn er hafin hjá HSK mönnum í frjálsum íþróttum. 

Mynd: Frá haustfundinum.