Héraðssamband Snæfellsnes og Hnappadalssýslu

Flokkur: Almennar fréttir

01.06.2011 23:31

Kvennahlaupið 2011

Sjóvá Kvennahlaup ÍSÍ

 

Sjóvá Kvennahlaup ÍSÍ fer fram laugardaginn 4. júní á 84 stöðum hér á landi og 17 stöðum erlendis.

Snæfellsbær

Staðarsveit

Hlaupið frá Lýsuhólsskóla kl. 11:00. Vegalengdir í boði: 2 km og 5 km..
Forskráning á Hraunsmúla í Staðarsveit. Frítt í sund að loknu hlaupi.

Ólafsvík
Hlaupið frá Sjómanngarðinum kl. 11:00. Vegalengdir í boði: 2,5 km og 5
km. Forskráning í Sundlauginni Ólafsvík. Frítt í sund að loknu hlaupi.

Grundarfjörður
Hlaupið frá Íþróttahúsi Grundarfjarðar kl. 11:00. Ratleikur um bæinn eða
skokk. Skráning hjá Kristínu Höllu. Þátttakendum er boðið í sund að loknu hlaupi

Stykkishólmur
Hlaupið frá Íþróttamiðstöðinni kl. 11:00. Vegalengdir í boði: 3 km - 5 km
og 7 km. Forskráning í Bónus í Stykkishólmi og Íþróttamiðstöðinni á
hlaupadag. Frítt í sund að loknu hlaupi.


 

Í ár er yfirskrift hlaupsins "Hreyfing allt lífið" að tilefni samstarfs ÍSÍ við Styrktarfélagið Líf.

 Sjóvá stendur fyrir léttum leik þar sem fjöldi vinninga er í boði, gjafakort uppá 30.000 kr, dekurdagur ofl. Það eina sem þarf að gera er að skrá nafnið sitt á ákveðna miða á hlaupadag eða fara inn á sjova.is og taka þátt í leiknum þar.

 

Fjölbreytt dagskrá verður um allt land á hlaupastöðum enAllar upplýsingar um hlaupastaði og forsölu á bolum er að finna á sjova.is


23.05.2011 10:19

Langar þig að taka þátt


NORRÆN UNGMENNAVIKA 31. JÚLÍ - 7. ÁGÚST 2011

 

Ungmennafélag Íslands auglýsir eftir þátttakendum á aldrinum 14 - 24 ára til að taka þátt í norrænni ungmennaviku á vegum NSU, sem verður í Svíþjóð, Álandseyjum og Finnlandi.

 

 "Að upplifa list og leiki í nýjum löndum"

verður þema ungmennavikunnar.   Ævintýrið hefst í Stokkhólmi þann 31.júlí nk.  

Síðan verður farið til Álandseyja og þaðan til Finnlands, þar sem þessu lýkur.

 

Verð er kr. 60.000.- og er flug og uppihald innifalið í því.  UMFÍ styrkir einstaklinga innan sinna vébanda  og kemur það til lækkunar á framangreindu verði.  Eins gefum við upplýsingar um möguleika á frekari styrkjum.

 

Íslenskur fararstjóri frá UMFÍ fer með hópnum.

 

Umsóknarfrestur er til 31. maí nk. á netfanginu omar@umfi.is


23.05.2011 07:21

Opnað hefur verið fyrir skráningu á 1. Landsmót UMFÍ 50+


opnad_fyrir_skraninguOpnað hefur verið fyrir skráningu á 1. Landsmót UMFÍ 50+ sem haldið verður á Hvammstanga 24.-26. júní.  Af þessu tilefni komu þeir Ágúst Þorsteinsson og Árni Einarsson við í Þjónustumiðstöð UMFÍ í Sigtúni í Reykjavík og skráðu sig til þátttöku í mótinu.


Ágúst Þorsteinsson hefur alla tíð keppt undir merkjum Íslendings sem er aðildarfélag innan Ungmennasambands Borgarfjarðar. Eitt af fyrstu stórmótum Ágústs var þátttaka í Landsmóti UMFÍ á Akranesi 1975. Þar keppti hann í sundi. Lengstum var Ágúst í hópi þekktustu langhlaupara landsins. Hans keppnisferli lauk 1983 en þá keppti Ágúst á heimsmeistaramótinu sem þá var haldið í Helsinki. Í dag leikur Ágúst golf sér til skemmtunar.


Árni Einarsson verður 80 ára í haust. Hann byrjaði að keppa 18 ára gamall en hans félag alla tíð hefur verið Ungmennafélag Selfoss.  Aðalgrein Árna lengstum var kringlukast. Árið 1957 hætti Árni að keppa en tók upp þráðinn að nýju fyrir þremur árum síðan, 77 ára að aldri. Hann hefur keppt á Evrópu- og Norðurlandamótum öldunga en frá því að hann fór að keppa að nýju 2008 hefur hann unnið til 56 verðlaunapeninga.


Keppnisgreinar á mótinu eru eftirfarandi: Badminton, blak, boccia, bridds, fjallaskokk, frjálsar íþróttir, golf, hesta íþróttir, línudans, pútt, skák, starfsíþróttir, sund og þríþraut.


Skráning og aðrar upplýsingar um mótið eru að finna á  www.landsmotumfi50.is


Þátttökugjald  er 6.000 kr. óháð greinafjölda. Innifalið í verðinu er keppni, tjaldsvæði og afþreying meðan á mótinu stendur.

 

Mynd: Ágúst Þorsteinsson og Árni Einarsson skrá sig til þátttöku á Landsmót UMFÍ 50+.

19.05.2011 16:51

Áhugaverðar niðurstöður um brottfall úr íþróttum

Athyglisverðar niðurstöður á hádegisfundi ÍSÍ

ÍSÍ bauð upp á hádegisfund miðvikudaginn 19. maí þar sem Rúna H. Hilmarsdóttir kynnti niðurstöður í lokaverkefni hennar til meistaraprófs í upplýsingatækni við Háskóla Íslands. Rúna greindi íþróttaþátttöku og brottfall barna og unglinga, fæddra 1990 og 1995 á árunum 1994-2009.

Meðal niðurstaðna hjá Rúna má nefna að börn sem hafa aðeins æft eina íþróttagrein frá upphafi íþróttaiðkunar eru líklegri til að vera hætt iðkun 14 ára gömul en þau börn sem æft hafa fleiri íþróttagreinar.  Rúna nefnir einnig að íþróttaþátttaka meðal barna hafa aukist talsvert.  Í þriðja lagi nefnir Rúna að samkvæmt níðurstöðum á 1995 árgangnum þá virðast stelpur og strákar hafa fengið jöfn tækifæri til að taka þátt í íþróttastarfi.

Lokaverkefni Rúnu má lesa á skemman.is, slóðin er http://skemman.is/handle/1946/7184

Glærur frá fyrirlestri Rúnu verða settar inn á heimasíðu ÍSÍ.

10.05.2011 22:08

Rúnar Geirmunds með Íslandsmet





















Rúnar Geirmundsson, kraftlyftingamaður frá Grundarfirði, er aldeilis að gera það gott í kraftlyftinga-bransanum þessa dagana. Rúnar var að keppa á móti sl. laugardag hjá kraftlyftingasambandi sem heitir RAW, hjá Magnúsi Ver Magnússyni. RAW þýðir einfaldlega hrátt og þar er allur búnaður bannaður. Þar má maður einungis vera með belti og öryggisvafninga um úlnliði og hné. Þar keppti Rúnar í hnébeygju, réttstöðulyftu og bekkpressu. Hann tók 417,5 kg í samanlögðu og var í -67,5 kg flokki. Rúnar gerði sér lítið fyrir og jafnaði heimsmet hjá þessu sambandi í réttstöðulyftu og þegar hann fór að rýna í önnur heimsmet þá bætti hann einnig heimsmet í hnébeygju um 2,5 kg auk þess að setja sex Íslandsmet.

 "Ég fæ öll Íslandsmetin skráð en ekki Heimsmetin vegna þess að þetta var ekki alþjóðlegt mót. Það truflar mig svo sem ekki mikið þar sem að ég veit þetta sjálfur," sagði Rúnar glaður í bragði þegar hann sýndi ljósmyndara Skessuhorns alla verðlaunagripina sína.  Rúnar er margfaldur Íslandsmeistari, hefur sett Íslandsmet alls tólf sinnum og einu sinni hefur hann orðið Evrópumeistari, alltaf í -67,5 kg flokki. Í sumar ætlar hann að taka sér hlé frá keppnum og æfa vel til að komast upp í -75 kg flokkinn en stefnan er sett á að vera í þeim þyngdarflokki þegar hann og bróðir hans, Heiðar Geirmundsson, fara út til Flórída og keppa á HM í Bandaríkjunum í nóvember næstkomandi.

 

29.04.2011 09:20

Þátttaka er lífstíll

Málþing, þátttaka er lífsstíll, á vegum Mennta- og menningarmálaráðuneytisins, Ungmennafélags Íslands og Héraðssambands Snæfellsness- og Hnappadalssýslu var haldið í sal Fjölbrautarskóla Snæfellinga í gær, fimmtudag

Ráðstefnustjóri var Ingi Þór Steinþórsson

Dagskrá málþingsins var fjölbreytt en það hófst á ávarpi Berglindar Axelsdóttur bæjarfulltrúa í Stykkishólmsbæ. Þá kynnti ungmennaráð UMFÍ sína starfsemi og sá Halldóra Guðjónsdóttir fulltrúi í ráðinu um hana. Sölvi Óskarsson meðlimur í ungliðastarfi björgunarsveitanna kynnti starfsemi sveitanna. 

Þá fór fram kynning á forvarnarstarfi og notkun á munntóbaki og hafði jafningjafræðslan umsjón með þessari kynningu undir handleiðslu Hersir Arons Ólafssonar og Blædísar Köru Baldursdóttur.  Þá kynnti Eva Vilhjálmsdóttir starfsmaður Evrópa unga fólksins verkefnið sem er styrkjaáætlun fyrir ungt fólk. Þá kynnti Daði Magnússon starfsemi ungmennahús í Snæfellsbæ. Þá var flutt tónlistaratriði og leikklúbbur fjölbrautarskólans flutti atriði.

Vinnuhópar:
Þátttaka er lífstíll, hópstjóri Garðar Svansson.
Staða og framtíð æskulýðsstarfs og Ungmennasmiðja  á Snæfellsnesi, hópstjóri Sigrún Ólafsdóttir
Samstarf og tengsl stjórnvalda og æskulýðsstarfs, hópstjóri Björn Ásgeir Sumarliðason.

Ráðstefnan heppnaðist mjög vel og voru þátttakenndur ánægðir með dagskrá og inntak ráðstefnunar.

Góð þátttaka var en nálægt 100 þátttakenndur komu í allt að ráðstefnuninni. 

http://umfi.is/umfi09/upload/images/frettir/malthing_i_grundarfirdi.jpg



 



27.04.2011 13:57

Þátttaka er lífstíll

Þátttaka er lífsstíll
Ungt fólk á Snæfellsnesi 

Málþing á vegum Mennta- og menningarmálaráðuneytisins, Ungmennafélags Íslands og Héraðssambands Snæfellsness- og Hnappadalssýslu

Fimmtudaginn 28. apríl 2011 kl. 12:30-15:30 haldið á sal Fjölbrautaskóla Snæfellinga.
Ekkert þátttökugjald er á málþingið.

Ráðstefnustjóri: Ingi Þór Steinþórsson

Dagskrá:

·         Ávarp: Gyða Steinsdóttir, bæjarstjóri Stykkishólmsbæjar       (5 mín)  Búið 12:35

·         Tónlistaratriði: Særós Sævaldsdóttir, söngur                          (10 mín) 12:45

·         Ungmennaráð UMFÍ                                                                     (10 mín) 12:55

·         Ungliðastarf Björgunarsveitanna                                                            (10 mín) 13:05

 

·         Forvarnarstarf; "Bagg er bögg"                                                   (20 mín) 13:20

·         Ungmennahús í Snæfellsbæ                                                     (10 mín) 13:30

·         Skemmtiatriði: leiklistarhópur FSN                                                             (15 mín) 13:45

·         Kynning á Evrópu unga fólksins                                                             (20 mín) 14:05

Veitingar frá Kaffi 59 í boði ráðstefnuhaldara          ( 15 mín) 14:20

·         Vinnuhópar: í stofum í 40 mín og kynning á niðurstöðu í sal í 20 mín (60 mín) 15:20
Þátttaka er lífsstíll, hópstjóri: Garðar Svansson                           
Staða og framtíð æskulýðsstarfs á Snæfellsnesi, hópstjóri: Pétur Vilberg Georgsson
Samstarf og tengsl stjórnvalda og æskulýðsstarfs, hópstjóri: Björn Ásgeir Sumarliðason
Ungmennasmiðja á Snæfellsnesi (samskipti og samgöngur), hópstjóri: Sigrún Ólafsdóttir

·         Niðurstöður vinnuhópa kynntar

Vinsamlegast skráið þátttöku á netfangið alda@umfi.is eða í síma 863-2665

Allir velkomnir

16.04.2011 22:48

Þáttta er lífstíll,

Þátttaka er lífsstíll - Fjölmennt málþing var haldið á Sauðárkróki

malthing_a_kroknum_2Málþing, undir yfirskriftinni þátttaka er lífsstíll, á vegum Mennta- og menningarmálaráðuneytisins, Ungmennafélags Íslands, Ungmennasambands Skagafjarðar var haldin á Sauðárkróki í gær. Málþingið,sem haldið var á sal Fjölbrautaskóla Norðurlands vestra var afar vel sótt af  kennurum og nemendum grunn-og framhaldsskólans en um 200 manns voru á málþinginu. Ráðstefnustjóri var Ómar Bragi Stefánsson.


Dagskrá málþingsins var fjölbreytt en það hófst á ávarpi Ástu Björgu Tómasdóttur sveitarstjóra sveitarfélagins Skagafjarðar. Þá kynnti ungmennaráð UMFÍ sína starfsemi og sá Halldóra Guðjónsdóttir fulltrúi í ráðinu um hana. Meðlimir björgunarsveit Skagafjarðar kynntu starfsemi sveitarinnar.


Þá fór fram kynning á forvarnarstarfi og notkun á munntóbaki og hafði jafningjafræðslan umsjón með þessari kynningu undir handleiðslu Reynir Hans og Hólmfríði Gylfadóttur.  Þá kynnti Hjörtur Ágústsson starfsmaður Evrópa unga fólksins verkefnið sem er styrkjaáætlun fyrir ungt fólk. María Björg Ingvadóttir sagði frá starfsemi Húsi frítímans á Sauðárkróki. Auk þess voru flutt tónlistaratriði.


Að loknum þessum kynningum var þátttakendum málþingsins skipt í vinnuhópa sem voru eftirtaldir. Þátttaka er lífsstíll og var hópstjóri Kristbjörg Kemp. Staða og framtíð æskulýðsstarfs í Skagafirði og var hópstjóri Þorkell Þorsteinsson.Samstarf og tengsl stjórnvalda og æskulýðsstarfs þar sem Gunnar Sandholt stýrði umræðum í hópnum og loks fór fram umræða um Hús frítímans þar sem hópstjóri var María Björk Ingvadóttir.


Mjög góð og lifandi umræða fór fram í vinnuhópunum þar sem umræða var m.a um stöðu ungs fólks í Skagafirði frá ýmsum sjónarhornum. Unga fólkið tók virkan þátt í umræðunni og koma fram margar skemmtilegar hugmyndir. Það kom samt skýrt fram hjá unga fólkinu að gott væri að búa í Skagafirði og margs konar æskulýðs- og íþróttastarf væri i boði á svæðinu.

 

  Sjá viðtal við Þorkel Þorsteinsson aðstoðarskólameistara Fjölbrautarskóla Norðurlands vestra.


14.04.2011 07:01

73 þing HSH


73 þing HSH var haldið á Kaffistofu KG fiskverkunar á Rifi í gær og hófst kl. 18. Á þinginu var Hermundur Pálsson kjörinn nýr formaður og Edda Sóley Kristmannsdóttir kom ný í stjórn. Garðar Svansson fyrrverandi formaður var kjörinn í varastjórn Íþrótta og Ólympíusambands Íslands síðasta laugardag og  vek því úr sæti formanns síðasta sunnudag. Gestir þingsins voru Helga Guðrún Guðjónsdóttir, formaður UMFÍ og Sæmundur Runólfsson, framkvæmdarstjóri UMFÍ. Garðar flutti kveðjur frá Ólafi Rafnssyni forseta ÍSÍ. Veittar voru viðurkenningar fyrir íþróttamenn HSH og er
Þorsteinn Már Ragnarsson knattspyrnu og íþróttamaður HSH 2010
Hugrún Elísdóttir, Kylfingur , Hlynur Bæringsson, Körfuknattleiksmaður, Siguroddur Pétursson, Hestíþróttamaður, Sunna Björk Skarphéðinsdóttir Blakmaður og María Valdimarsdóttir Sundmaður.
Vinnuþjarkur HSH voru svo þeir drengir Símon B Hjaltalín, Andri Freyr Hafsteinsson og Þorsteinn Eyþórsson og er viðurkenningin fyrir umsjón með heimasíðu Snæfells.
Óskum við öllum þeim til hamingju með árangur ársins. Veitingar voru í boði Snæfellsbæjar og í umsjá foreldra og barna sem fara á Gothiacup í Svíþjóð í sumar. Færum við þeim bestur þakkir fyrir frábærar veitingar. Starfsmenn þingsins voru Kristján Magnússon þingforseti, Hjörleifur K Hjörleifsson varaþingforseti, María Valdimarsdóttir og Harpa Jónsdóttir, ritarar.
Kristján Magnússon bauð svo til þings í Kolbeinstaðarhrepp að ári.
Hermundur Pálsson formaður HSH þakkaði þingsstarfsmönnum og  þingfulltrúum góð störf á þinginu  og óskaði öllum góðrar heimferðar og sleit þingi kl.21.08





12.04.2011 17:28

Þing HSH








73. Héraðsþing HSH

 

verður haldið Miðvikudaginn 13 apríl 2011 kl. 18:00

í Kaffistofu Fiskverkunar KG, Rifi.

 

 

Dagskrá:

 

1.     Þingsetning

2.     Tilnefning þingforseta, varaþingforseta og tveggja þingritara

3.     Skipun kjörbréfanefndar

4.     Skýrsla stjórnar

5.     Lagðir fram endurskoðaðir reikningar

6.     Umræður um skýrslu stjórnar og reikningar lagðir fram til samþykktar

7.     Kosning nefnda þingsins:

                           a) Fjárhagsnefnd

                           b) Íþróttanefnd

                           c) Allsherjar- og laganefnd.

8.      Ávörp gesta

9.      Fjárhagsáætlun lögð fram

10.    Framkomnar tillögur lagðar fram og vísað til nefnda

11.    Nefndarstörf

12.    Nefndarálit, umræður og atkvæðagreiðslur

13.    Kosningar

                             a) Formaður HSH

                             b) Aðrir í stjórn og varastjórn

                             c) Tveir skoðunarmenn og tveir til vara

                             d) Ráð og nefndir skv. gildandi samþykktum og reglum

                             e) Uppstillingarnefnd, 3 af formönnum aðildarfélaga HSH

                               sem starfa fram að næsta héraðsþingi

                             f) Kosning á Íþróttaþing ÍSÍ

14.    Önnur mál

15.             Þingslit.


12.04.2011 08:09

Setningarræða 70. Íþróttaþings ÍSÍ


Ólafur Rafnsson

Setningarræða 70. Íþróttaþings ÍSÍ

Stjórnvöld hafa brugðist

Forseti Íslands, Hr. Ólafur Ragnar Grímsson,
Mennta og menningamálaráðherra, Katrín Jakobsdóttir,
Formaður UMFÍ, Helga Guðjónsdóttir,
Ágætu Þingmenn, Heiðursfélagar ÍSÍ,
Góðir þingfulltrúar og aðrir gestir,

Ég býð ykkur velkomin til Íþróttaþings.

Við höldum nú Íþróttaþing í annað sinn síðan hrun varð í íslensku efnahagslífi á haustmánuðum 2008.  Þetta hefur verið tímabil fjárhagslegra þrenginga, óvissu og skerðingar ýmissa lífsgæða sem við höfðum fram að þeim tíma talið sjálfsögð.

Íslensk íþróttahreyfing er beinn þolandi þessa ástands - og sú fjárfesting forvarna og mannauðs sem byggst hefur upp á aldarlangri starfsemi hreyfingarinnar hefur laskast.  Á sama tíma er aðdáunarvert að fylgjast með æðruleysi og aðlögun ykkar sem starfa í grasrót íþróttahreyfingarinnar.  Þótt vissulega gæti reiði gagnvart skilningsleysi stjórnvalda hefur hreyfingin einbeitt sér að því að gæta að sínum félagsmönnum - og hlúð að kjarna grasrótarstarfsins.

Hið pýramídalagaða stjórnkerfi íþróttahreyfingarinnar er sá styrkur sem heldur starfseminni saman.  Mikilvægt er fyrir okkur að rjúfa ekki þá samstöðu, og gæta vel að því að þótt við störfum í einum hluta pýramídans þá eru aðrir hlutar hans nauðsynlegir.

Afreksfólkið okkar dregur vagninn sem fyrirmyndir fyrir æsku landsins - og varpar kastljósi athygli á árangur ástundunar skipulegs íþróttastarfs.  En með sama hætti þá falla íþróttastjörnur ekki af himnum ofan - heldur eru þær uppskera umfangsmikils starfs í neðri hluta pýramídans - grasrót hreyfingarinnar.  

Þetta er varhugavert að slíta í sundur - en ógnir steðja að því jafnvægi sem ríkt hefur.  Aukið fjármagn innan atvinnuíþrótta erlendis hefur að nokkru raskað því jafnvægi.  Mikilvægt er að fjármagn skili sér inn í íþróttahreyfinguna, en renni ekki í gegnum hana til hagsmunaaðila sem hafa jafnvel ekki íþróttastarfsemi sem aðalmarkmið.  

Í því samhengi má nefna ólöglega veðmálastarfsemi og viðskiptalegt eignarhald á íþróttafélögum.  Ef ekki verður spyrnt við fótum kunna að opnast dyr fyrir skipulagða glæpastarfsemi - sem gjarnan er fylgifiskur fjármunamyndunar.  Þessi ógn kann að verða til staðar hér á landi sem erlendis ef ekki verður brugðist við.  Við ættum að hafa lært að virða ekki að vettugi blikkandi aðvörunarljós.

Við þurfum að huga að fjárhagslegri ábyrgð með þeim hætti að ungmenna- og uppbyggingarstarf framtíðar verði aldrei veðsett eða skuldsett.  Við megum ekki láta kapphlaup um markaðsstarfsemi leiða til þess að íþróttaeiningar eyði fjármunum umfram tekjur, til útgjalda sem ekki fela í sér virðisauka fyrir íþróttalegt starf.  

En hér er ábyrgð stjórnvalda jafnframt mikil.  Auk þess að veita atbeina sinn að því að spyrna við ólögmætum áhrifum á íþróttastarfsemi er nauðsynlegt að grundvöllur hinnar frjálsu íþróttastarfsemi sé styrktur með þeim hætti að stjórnunareiningar hennar hafi burði til að takast á við þessar ógnir - svo ekki sé minnst á burði til þess að standa undir skipulagningu hins mikla endurgjaldslausa sjálfboðaliðastarfs sem grundvallar forvarnir og grasrótarstarf íþróttahreyfingarinnar.

Hér hafa núverandi stjórnvöld því miður algerlega brugðist.

Þrátt fyrir fjölmarga fundi með stjórnvöldum hafa engar lausnir verið boðnar.  Það skal tekið fram að samskipti við menntamálaráðherra og fjárveitingavald hafa verið afar góð - en nær fullkomlega árangurslaus.  

Auðvitað erum við meðvituð um efnahagsástand og niðurskurð.  En ef litið er til forgangsröðunar innan ráðuneytis íþróttamála þá hefur verið myndarlega bætt í framlög til annarra þátta menningar á sama tíma og framlög ríkisvaldsins til íþróttamála hafa verið skorin inn að beini.  Við munum öll eftir því að í sömu viku og Íþróttaþing var haldið fyrir 2 árum voru framlög til listamannalauna hækkuð myndarlega - þau ein nema nú u.þ.b. helmingi hærri fjárhæð en framlög ríkisins til íþróttahreyfingarinnar á fjárlögum.

Sambærilegur sjóður íþróttahreyfingarinnar - Afrekssjóður ÍSÍ - fær nú 24,7 milljónir á fjárlögum, eða rúmlega 5% af heildarframlögum til listamannalauna.  Hefur sá sjóður rýrnað umtalsvert að verðgildi og er nú innan við helmingur að raunvirði frá því menntamálaráðuneytið gerði síðast samning við ÍSÍ um þann sjóð árið 2003.  Þetta er auðvitað vert að hafa í huga næst þegar við fögnum Evrópu- eða Ólympíumeisturum með íslenska fánann á brjóstinu.

Niðurskurður á hóflegum rekstri skrifstofu ÍSÍ hefur verið mikill - en á sama tíma hafa bæst umtalsverð gjöld á hreyfinguna í formi tryggingargjalds og annarra skattahækkana.  Okkur þykja það ekki góð skilaboð til að grundvalla hið mikla samfélagslega verðmæta starf sem unnið er innan íþróttahreyfingarinnar.  

Okkur þykir það ekki góð fjárfesting að vannýta það starf sem margfaldar hverja krónu sem til þess er lagt.  Það virðist stundum gleymast að menn eru ekki að biðja um framlög í eigin þágu - heldur til þess að eiga þess kost að starfa í endurgjaldslausri samfélagsþjónustu fyrir íslenska þjóð.  Það er vert að hafa það í huga þegar samanburður við aðra þjóðfélagshópa er gerður.

Fjármál ÍSÍ eru rekin af mikilli ábyrgð, og ég fullyrði að hvergi er bruðlað með fé.  Frá efnahagshruni hafa endar náðst saman fyrst og síðast með útsjónarsemi gjaldkera okkar Gunnars Bragasonar og framkvæmdastjóra Líneyju Rutar - og viðeigandi er að halda því til haga að hvergi hafði fé verið ávaxtað af áhættu, og hvergi tapaðist fé vegna fjárfestinga í hruninu.  Nú er hinsvegar svo komið að gengið hefur á eigið fé og kostnaður hefur stóraukist af þátttöku í mótum erlendis vegna óhagstæðrar gengisþróunar.  

Það hefur verið forgangsmál hjá stjórn ÍSÍ þrátt fyrir þetta að reyna að halda úti óbreyttri þjónustu við sambandsaðila - en ljóst má vera að komið er að þolmörkum í þeim efnum.  Því miður mun að óbreyttu þurfa að skerða þá þjónustu, og mun það án efa koma niður á því góða starfi sem unnið er innan ykkar raða, ágætu sambandsaðilar.

Við höfum þegar séð þess merki í formi niðurskurðar slysabótasjóðsins - sem ÍSÍ tók að sér sem þjónustuaðili fyrir ríkisvaldið á sínum tíma - og kom þar með í veg fyrir að þau framlög yrðu lögð niður.  Á sama tíma hefur bæði þörfin fyrir þá þjónustu aukist vegna niðurskurðar annarsstaðar, og  gjaldskrár hækkað.  Það er brýnt að Velferðarráðuneytið komi þeim málum aftur í það horf sem viðunandi er fyrir íþróttahreyfinguna.

Það hefur verið skýr stefna okkar að ráðast ekki á aðra til þess að rökstyðja mikilvægi fjárframlaga til starfseminnar.  Þótt íþróttahreyfingin hafi í sjálfu sér ekki gert annað en að fagna auknum fjárframlögum til lista- og menningarstarfsemi þá hafa á hinn bóginn í vaxandi mæli stigið fram á sjónarsviðið aðilar úr þeim ranni sem hafa viljað stilla íþróttum og listum upp sem andstæðingum þegar kemur að stuðningi hins opinbera.  Þetta tel ég ranga nálgun - alranga - en hef þó talið mér rétt og skylt að verja mína hreyfingu ef á hana er ráðist með þeim hætti.

Íþróttir og listir eru tvær hliðar á sama teningi - menningu þjóðarinnar.  Vilji menn taka samanburð þá skulu menn gera það af fullum heiðarleika og leggja öll spilin á borðið.  Heildarframlög til íþróttahreyfingarinnar nema u.þ.b. 330 milljónum króna á fjárlögum - að meðtöldum framlögum til sérsambanda og ferðakostnaðarsjóðs - en sá liður sem felur í sér listir og menningu í sama ráðuneyti nemur um 6-7 milljörðum króna - sex til sjö þúsund milljónum.  Sá liður hefur frá árinu 2008 hækkað um u.þ.b. 200 milljónir á sama tíma og lækkun framlaga til langstærstu fjöldahreyfingar landsins hefur verið 100 millj.  

Og það sem verra er - stóra súlan vill tína fleiri epli úr garði litlu súlunnar.  Ítrekað hefur verið ráðist að tekjustofnum íþróttahreyfingarinnar sem felast í lottó og getraunum - án þess að stjórnvöld hafi með nokkrum hætti komið fram og varið það brothætta kerfi sem íþrótta- og ungmennafélagshreyfingin býr við.  Þvert á móti liggja fyrir yfirlýsingar innanríkisráðherra um að hann vilji skoða skerðingar okkar tekna í þágu annarrar menningarstarfsemi - stóru súlunnar.

Við rekum hér á kostnað ríkisins landslið í sinfóníutónleik, leiklist, óperuflutningi og listdansi, svo dæmi séu tekin.   Allt glæsileg landslið - og sómi þjóðarinnar á erlendri grundu.  En ég hygg að eitthvað myndi heyrast ef við myndum krefjast þess að landslið okkar t.d. í knattspyrnu og handknattleik færu með sama hætti á launaskrá ríkisins.

Það er nefnilega þannig að það verður ekki fyrr en listastarfsemi verður rekin á sama sjálfboðaliðagrundvelli og íþróttahreyfingin sem unnt er að gera réttmætan samanburð á rekstrarforsendum og ríkisframlögum.  Það vekur raunar upp spurningar hvort við séum á rangri leið - ættum ef til vill að íhuga hvor ríkisrekstur á listastofnunum sé ekki ómur fortíðar, og efla fremur styrki og framlög til frjálsrar áhugalistastarfsemi - sem víða blómstrar á Íslandi.  Þá - og ekki fyrr en þá - er unnt að bera þetta saman við starfsemi íþróttahreyfingarinnar.

Bygging Hörpunnar - glæsilegs tónlistarhúss - er ánægjuefni, og vil ég nota tækifærið og óska unnendum lista og menningar til hamingju með verðugan vettvang.  Ætla mætti að sú ákvörðun að ljúka við 27 milljarða framkvæmd í bullandi niðurskurði fjárlaga myndi  leiða til skilnings þess þjóðfélagshóps sem mun þar iðka sína starfsemi - á því að aðrir sambærilegir geirar menningar muni ekki sæta niðurskurði til að fjármagna þá ákvörðun.

En það virðist öðru nær.  Þessi góða framkvæmd - sem vel að merkja kostar jafn mikið í byggingu og ríkið leggur til allrar íþróttahreyfingarinnar í 80 ár miðað við núverandi framlög - kostar í rekstri a.m.k. þrefalt meira en árlegt framlag til íþróttahreyfingarinnar.

Íþróttahreyfingin tekur ekki afstöðu til stjórnmálalegra skoðana - mikilvægasta stjórnmálamynstur fyrir íþróttahreyfinguna eru ríkjandi stjórnvöld hverju sinni.  Hinsvegar verður núverandi ríkisstjórn að gera upp við sig hvað hún hyggst gera til framtíðar í málefnum íþróttahreyfingarinnar - hvort hún ætli að verða fyrsta ríkisstjórn í lýðveldissögunni til þess beinlínis að stilla sér upp andspænis hinni frjálsu íþróttahreyfingu í landinu.  

Það er raunar kaldhæðnislegt að - auk niðurskurðar og skattahækkana - séu einu áþreifanlegu yfirstandandi aðgerðir ríkisvaldsins gagnvart íþróttahreyfingunni fólgnar í undirbúningi reglna til að þjóðnýta - bótalaust - hugverkaréttindi hreyfingarinnar á grundvelli tilskipunar Evrópusambandsins um útsendingar frá íþróttaviðburðum í ólæstri dagskrá - hugverkaréttindi sem byggð hafa verið upp með margra áratuga langri sjálfboðastarfsemi þess pýramída sem lýst var hér áðan.

Og á hvaða grundvelli skyldi það nú vera gert?  Jú, á þeim forsendum að um sé að ræða viðburði sem taldir eru hafa "verulega þýðingu í þjóðfélaginu" eða "sérstaka menningarlega þýðingu" eins og segir í umræddri tilskipun.  Það var og.  Er virkilega enginn innan ríkisstjórnar Íslands sem kemur auga á mótsögn hér?  Væri ekki nær að stjórnvöld myndu vera sjálfum sér samkvæm og efla framlög til þeirrar starfsemi sem hefur þessa verulegu þýðingu fyrir þegna landsins - starfsemi sem þau vilja nú þjóðnýta með framangreindum hætti.

Mér er ekki kunnugt um að til standi með sama hætti að þjóðnýta hugverkaréttindi okkar frægasta listafólks.  Þvert á móti.  Því hafa ber í huga að ef íþróttaáhugamaður vill fara t.d. á veitingastað og njóta útsendingar íþróttakappleiks þá þarf sá hinn sami fyrst að greiða lögbundið gjald til tónskálda og eigenda flutningsréttar tónlistar áður en hann fær að sjá íþróttaviðburðinn.  STEF gjöld.  Sér virkilega enginn neitt athugavert við þessa þversögn innan þess ráðuneytis sem er í fyrirsvari fyrir báða málaflokka?

Það er hinsvegar laukrétt í þessu samhengi að íþróttir skipa afar stóran sess í hjörtum þjóðarinnar.  Áhorf í sjónvarpi á stóra íþróttaviðburði þar sem íslenskir íþróttamenn etja kappi er fordæmalaust.  Þriðjungur íslensku þjóðarinnar er beint skráður og virkur í íþróttahreyfingunni, annar þriðjungur óbeint virkur í formi almenningsíþrótta og almennrar hreyfingar sem byggst hefur upp fyrir tilstilli grasrótarstarfsins - og segja má með sanni að sá þriðjungur sem eftir stendur fylli flokkinn á tyllidögum þegar afreksfólk okkar kemur heim með medalíur í farteskinu.

Í þeim hópi hafa ekki síst verið kjörnir fulltrúar þjóðarinnar.

Að baki þessu starfi stendur ósérhlífin sveit sjálfboðaliða og stjórnenda sem unnið hefur að uppbyggingu pýramídans í heila öld.  Það er sá efnahagsreikningur mannauðs sem hefur fyrst og síðast fleytt okkur í gegnum efnahagsörðugleikana - það er sú auðlegð sem aldrei verður af okkur tekin með niðurskurðaráformum.

Ég tel raunar nauðsynlegt að við förum að skrásetja þennan mannauð betur - og tel ekkert óeðlilegt við að íþróttafélög vinni að því að gera aðskilin reikningsskil fyrir sinn rekstur, annarsvegar hefðbundin fjármunareikningsskil - en hinsvegar efnahags- og rekstrarreikning þess sjálfboðaliðastarfs sem fram fer innan hvers félags.  Ég hygg að það muni koma mörgum á óvart hversu umfangsmikið það starf er, en þegar hafa verið lögð drög að slíkri skráningu innan Íþrótta- og Ólympíusambands Íslands.

Ég vil þakka okkar ágætu félögum í Ungmennafélagi Íslands fyrir gott samstarf á liðnu kjörtímabili.  Helga Guðjónsdóttir hefur veitt samtökunum forystu af miklum glæsibrag og samskiptin verið góð.

Viðvarandi umræða hefur verið innan beggja hreyfinga um samlegðaráhrif af því að auka samstarf - jafnvel með sameiningu - þessara tveggja samtaka, og þá ekki síst í ljósi efnahagslegs niðurskurðar.  Það er í samræmi við aðrar hagræðingaraðgerðir í okkar samfélagi - og má þar meðal annars nefna sameiningu ráðuneyta sem hafa með höndum talsvert ólíkari starfssvið en ÍSÍ og UMFÍ.

Þrátt fyrir farangur fortíðar má segja að starfsemi þessara góðu systursamtaka hafi aldrei legið jafn nærri hvor annarri og nú.  Þótt vissulega heyrist raddir um sameiningu fyrst og fremst á grundvelli hagræðingar og fjárhagslegs sparnaðar þá er þetta í mínum augum fyrst og síðast sóknarfæri til þess að efla starfsemina í þágu okkar aðildarfélaga - sem eru sameiginleg í flestum tilvikum.  Öll aðildarfélög UMFÍ eru jafnframt innan vébanda ÍSÍ.

Má þar auðvitað sem dæmi nefna að bæði samtökin hafa staðið fyrir góðum verkefnum á sviði almenningsíþrótta - raunar jafnvel svo að töluverður ruglingur hefur orðið þar á - og að umfangsmesta starfsemi UMFÍ felst í skipulagningu eins besta einstaka viðburðar fyrir foreldra og ungmenni í íslensku samfélagi nú um stundir - hinu árlega Unglingalandsmóti - sem þegar allt kemur til alls er íþróttamót, sem byggir að stofni til á uppbyggingu og starfsemi sérsambanda Íþrótta- og Ólympíusambands Íslands.  

Það er viðburður sem ég hygg að myndi eflast verulega með sameiningu - og umfram allt með því að gefa öllum Íslendingum kost á að taka þátt sem fullgildum meðlimum - og að öllum sveitarfélögum landsins yrði gert kleyft að gerast mótshaldari á jöfnum forsendum.  Það yrði fyrst Unglingalandsmót fyrir Ísland allt.

Mér er kunnugt um að umræða hefur orðið á vettvangi nokkurra héraðssambanda um þessi mál.  Sú umræða hefur verið málefnaleg og á forsendum viðkomandi íþróttahéraða.  

Ég hef ávallt sagt frá því ég tók fyrst við embætti forseta ÍSÍ að ég myndi ekki sjá fyrir mér þvingun á samruna.  Slíkt veit aldrei á gott.  En meginatriðið er að við megum aldrei gleyma hverja við störfum fyrir - það eru iðkendur og félagar í okkar hreyfingu.  Enginn einstaklingur eða samtök eru svo stór að gangi framar þeim hagsmunum.

Framundan er hundraðasta afmælisár ÍSÍ - en þann 28. janúar næstkomandi er liðin öld frá því að Íþróttasamband Íslands var stofnað á miklum umbrotatímum í íslensku samfélagi.  Níu árum síðar - árið 1921 var Ólympíunefnd Íslands stofnuð - en þessi samtök voru svo sameinuð í Íþrótta- og Ólympíusambandi Íslands árið 1997.

Ráðgert er að halda upp á afmælisárið af glæsibrag, og hafa starfað starfshópar bæði vegna ritunar sögu sambandsins, sem og skipulagningar afmælisársins.  Ég vonast til þess að sem flest ykkar muni njóta þeirra viðburða sem á boðstólum verða.

Nauðsynlegt er að starfsemi jafn fjölbreyttra samtaka og ÍSÍ sé í stöðugri þróun og með skýra sýn til framtíðar.  Á formannafundum undanfarin ár höfum við kynnt fyrir ykkur með skilmerkilegum hætti okkar stefnumótun og framtíðarsýn.

Fyrir þessu þingi hér liggur ennfremur afrakstur umfangsmikillar vinnu hópa sem skipaðir voru í kjölfar síðasta Íþróttaþings - til að ramma inn störf og stefnumarkmið íþróttahreyfingarinnar í formi innra skipulags hreyfingarinnar, og leggja jafnframt drög að ytra skipulagi hreyfingarinnar og íþróttamála á Íslandi til framtíðar.  Vil ég færa formönnum þeirra hópa - Lárusi Blöndal varaforseta og Helgu Steinunni Guðmundsdóttur ritara - sem og þeim fjölmörgu sem þar hafa lagt hönd á plóginn - mínar bestu þakkir.  

Þrátt fyrir gagnrýni og skort á stuðningi frá stjórnvöldum - þá tel ég hér tilefni til þess að færa þakkir til eins fulltrúa íslensks ríksvalds sem ávallt hefur sýnt íþróttahreyfingunni virðingu og stuðning.  Þetta er aðili sem hefur verið ósérhlífinn við að tala máli íslenskrar æsku og íþróttahreyfingar - og man ég vart eftir öðru en að hann hafi brugðist vel við málaleitunum um að þiggja boð til viðburða hjá stórum sem smáum aðilum innan hreyfingarinnar.

Er ég hér að tala um verndara Íþrótta- og Ólympíusambands Íslands - Forseta Íslands Hr. Ólaf Ragnar Grímsson.  Vil ég færa honum sérstakt þakklæti fyrir öflugan stuðning, og gott samstarf á undanförum árum.

Þá vil ég þakka meðlimum Ólympíufjölskyldunnar - Icelandair, Sjóvá, Valitor og Íslandsbanka - fyrir gott samstarf og endurnýjun samninga á nýafstöðnu kjörtímabili.  Þrátt fyrir erfitt rekstrarumhverfi hafa þessir aðilar ekki hlaupist brott, og hafa staðið með okkur - og eru okkur mikilvægir til að takast á við þau stóru verkefni sem framundan eru, ekki síst Ólympíuleikana í London á næsta ári.

Þá tel ég rétt að færa þakkir til hinnar frábæru liðsheildar sem myndar kjörna framkvæmdastjórn Íþrótta- og Ólympíusambands Íslands.  Þar hefur ríkt mikill einhugur, og eflaust gera fæstir sér grein fyrir því hversu mikið starf þeir einstaklingar inna af hendi.  Eru flest þau störf ekki í sviðsljósinu - en allir stjórnarmenn hafa með höndum ákveðin ábyrgðarsvið og hlutverk innan stjórnskipulagsins.  Allt frábærir einstaklingar með hugsjón fyrir íþróttum - og stuðning við ykkar starfi í grasrótinni.  Það eru forréttindi að fá að koma fram fyrir hönd þessa hóps og vera hluti af honum.  Ég er ánægður með hversu stór hluti liðsins hefur áfram boðið fram krafta sína í þágu hreyfingarinnar - og það traust sem núverandi stjórn hefur verið sýnt af ykkar hálfu.  

Að lokum vil ég færa sérstakar þakkir til Líneyjar Rutar Halldórsdóttur framkvæmdastjóra ÍSÍ fyrir afar náið og gott samstarf undanfarin ár.  Hið sama má segja um einstaklega þolinmótt og duglegt starfslið hennar á skrifstofu ÍSÍ.  

Viðfangsefnin eru fjölbreytt - og hvort sem menn eru að slökkva elda eða kveikja eldmóð - þá er mannauðurinn ómetanlegur, og viðhorfið jákvætt.  Þið eruð öll að vinna frábært starf - og fyrir það er ég þakklátur.  Ég óska ykkur öllum velfarnaðar í ykkar störfum og hlakka til að eiga við ykkur samstarf á komandi starfstímabili.

Ég segi 70. Íþróttaþing sett.


Ólafur E. Rafnsson

forseti ÍSÍ

10.04.2011 00:20

Garðar form HSH kjörinn í varastjórn Framkvæmdarstjórnar ÍSÍ

Ólafur endurkjörinn forseti ÍSÍ
70. Íþróttaþingi ÍSÍ var að ljúka í Gullhömrum í Grafarholti.  Ólafur Rafnsson var endurkjörinn forseti ÍSÍ með dynjandi lófaklappi.  Í framkvæmdastjórn ÍSÍ voru kjörin Friðrik Einarsson, Gunnar Bragason, Hafsteinn Pálsson, Helga Steinunn Guðmundsdóttir, Helga. H. Magnúsdóttir, Ingibjörg Bergrós Jóhannesdóttir; Jón Gestur Viggósson, Lárus Blöndal, Sigríður Jónsdóttir og Örn Andrésson.  Í varastjórn voru kjörnir Garðar Svansson, Gunnlaugur Júlíusson og Gústaf A. Hjaltason.
Þingstörf gengu vel fyrir sig, þingnefndir störfuðu á föstudagskvöld við yfirferð tillagna en þingið afgreiddi alls yfir 20 tillögur sem birtar verða á heimasíðu ÍSÍ eftir helgi.
Þingforsetar voru Daníel Jakobsson bæjarstjóri á Ísafirði og Steinn Halldórsson starfsmaður ÍBR.  Stýrðu þeir þinginu af röggsemi og festu.

08.04.2011 01:30

Íþróttaþing ÍSÍ

70. Íþróttaþing ÍSÍ

70. Íþróttaþing ÍSÍ verður haldið í Gullhömrum Grafarholti dagana 8. og 9. apríl næstkomandi. 
Fulltrúafjöldi er alls 188, það eru 94 frá sérsamböndum ÍSÍ og 94 frá héraðssamböndum og íþróttabandalögum.  Að auki eru fjórir fulltrúar úr röðum íþróttafólks.
Þingsetning verður kl. 16:30 föstudaginn 8. apríl en nánari dagskrá, fyrirkomulag og tillögur sem leggja á fyrir þingið, má finna hér til vinstri á heimasíðunni ef smellt er á hnappinn sem merktur er þinginu. 

Ólafur Rafnsson núverandi forseti ÍSÍ er einn í kjöri til forsetaembættisins en á þinginu verður einnig kosið í framkvæmdastjórn og varastjórn ÍSÍ.  Ellefu einstaklingar hafa boðið sig fram í þau 10 sæti sem í boði eru til stjórnar og eru það eftirtalin, í stafrófsröð:
Friðrik Einarsson, Gunnar Bragason, Gústaf Adólf Hjaltason, Hafsteinn Pálsson, Helga Steinunn Guðmundsdóttir, Helga H. Magnúsdóttir, Ingibjörg Bergrós Jóhannesdóttir, Jón Gestur Viggósson, Lárus Blöndal, Sigríður Jónsdóttir og Örn Andrésson.
Helgi Sigurðsson, sem sæti átti í framkvæmdastjórn ÍSÍ síðasta kjörtímabil gefur ekki kost á sér til endurkjörs.

Í varastjórn eru þrjú sæti og eru þrír í framboði:   Garðar Svansson, Guðmundur Ágúst Ingvarsson og Gunnlaugur Júlíusson.
Þorgrímur Þráinsson, sem sæti átti í varastjórn ÍSÍ síðasta kjörtímabil gefur ekki kost á sér til endurkjörs.
Að auki er þeim sem ekki ná kjöri í framkvæmdastjórn boðið að gefa kost á sér til kjörs í varastjórn.

Myndin er tekin á 69. Íþróttaþingi ÍSÍ sem haldið var á Hilton Hótel Nordica árið 2009

31.03.2011 20:24

Landsmót 50+

Landsmót UMFÍ 50+ á Hvammstanga

lm50_merkiÁ stjórnarfundi Ungmennafélags Íslands, sem haldinn var 25. mars sl. í Þjónustumiðstöð UMFÍ í Reykjavík, var samþykkt að fyrsta Landsmót UMFÍ 50+ verði haldið á Hvammstanga í umsjá Ungmennasambands Vestur Húnvetninga dagana 24.-26. júní í sumar.

 

UMFÍ auglýsti eftir mótshaldara til að sjá um undirbúning og framkvæmd á fyrsta Landsmóti UMFÍ 50+ og bárust tvær umsóknir, frá USVH og HSK.

 

Mótið er sérstaklega ætlað einstaklingum 50 ára og eldri. Framkvæmd mótsins verður í höndum Ungmennafélags Íslands og USVH í samstarfi við sveitarfélagið Húnaþing vestra. Samstarfsaðilar eru Félag áhuga fólks um íþróttir aldraðra, FÁÍA, og Landssamband eldri borgara.

31.03.2011 20:22

Lýðháskólar

Þrír nýir danskir lýðháskólar til samstarfs við UMFÍ

vejleUngmennafélag Íslands hefur á undanförnum árum átt í samstarfi við íþróttalýðháskóla í Danmörku. Samstarfið hefur verið afar ánægjulegt og mikil ánægja hjá íslenskum ungmennum sem lagt hafa stund á nám í þessum skólum sem eru víðs vegar um Danmörku.

 

Að undanförnu hafa þrír skólar bæst í samstarfið við UMFÍ en það eru skólarnir Den Skandinaviske Designhøjskole sem staðsettur er í Randers en eins nafnið gefur til kynna þá snýst allt um hönnun í þessum skemmtilega skóla. Þá er það Musik og Teaterhøjskolen í Toflund en skólinn iðar af lífi frá morgni til kvölds.  Það er fjölmargt sem nemendum stendur til boða í skólnum svo sem tónlist, söngur, leiklist og dans svo eitthvað sé nefnt.  Loks er það Vejle Idrætshøjskole en skólinn hefur uppá fjölmargt að bjóða og má þar nefna fitness, sund, golf, hjólreiðar, handbolta, fótbolta ofl. ofl. 

 

Skólarnir sem UMFÍ er í samstarfi við eru því orðnir tíu talsins. Allar nánari upplýsingar um þessa skóla er að finna á heimasíðu UMFÍ www.umfi.is    Peter Sebastian fulltrúi skólans í Vejle er staddur hér á landi um þessar mundir ásamt Eyrúnu Eyjólfsdóttur sem stundar nám við skólann.

 

 


Mynd: Frá vinstri er Peter Sebastian, markaðsfulltrúi skólans í Vejle, Eyrún Eyjólfsdóttir, nemandi við skólann og Ómar Bragi Stefánsson landsfulltrúi UMFÍ.

HSH

Nafn:

Héraðssamband Snæfellsnes og Hnappadalssýslu

Farsími:

865-0294

Afmælisdagur:

24 september 1922

Heimilisfang:

Sólvellir 3. 350 Grundarfirði

Staðsetning:

Snæfellsnes

Heimasími:

436-1635

Önnur vefsíða:

umfi.is

Kennitala:

620169-5289

Bankanúmer:

0191-15-370322

Tenglar

Flettingar í dag: 2393
Gestir í dag: 152
Flettingar í gær: 846
Gestir í gær: 68
Samtals flettingar: 3301120
Samtals gestir: 253923
Tölur uppfærðar: 23.1.2018 23:15:22
Flettingar í dag: 2393
Gestir í dag: 152
Flettingar í gær: 846
Gestir í gær: 68
Samtals flettingar: 3301120
Samtals gestir: 253923
Tölur uppfærðar: 23.1.2018 23:15:22