Héraðssamband Snæfellsnes og Hnappadalssýslu

Flokkur: Knattspyrna

28.11.2012 15:17

Brynjar Kristmunds í æfingahóp U-21

27. nóvember 2012
Brynjar Kristmundsson leikmaður Víkings Ólafsvik var í dag valinn í æfingahóp U-21 landsliðs Íslands í knattspyrnu sem mun æfa í Kórnum næstkomandi sunnudag. 

Brynjar mun þ.a.l. ekki vera með Víkingum sem keppa í futsal sama dag en þá mun seinni umferð hraðmótsins fara fram í Árbænum. Brynjar var heldur ekki með þegar leikið var í Ólafsvík fyrir rétt rúmum tveimur vikum af sömu sökum. 

Mótið hefst klukkan 15:00 og fyrsti leikur Víkings verður gegn Stál-Úlfi klukkan 15:35 í Fylkishöllinni.  

24.11.2012 21:09

Víkingur með fullt hús stiga eftir 1 hraðmót

9/9 mögulegum í Futsal-Hraðmótinu

19. nóvember 2012 klukkan 11:17
Víkingar fóru vel af stað í Íslandsmótinu í Futsal en fyrri umferð riðlakeppninnar var leikin í Ólafsvík um helgina. Mótið var með svokölluðu hraðmótasniði þar sem hvert lið í riðlinum lék þrjá leiki með stuttu millibili. Liðin sem voru skráð til leiks voru Stál-Úlfur, Fylkir, Grundarfjörður og Víkingur Ólafsvík. 

Það er skemmst frá því að segja að Víkingar unnu alla sína leiki. Fyrsti leikur mótsins var gegn Stál-Úlfi þar sem lokatölur urðu 5-1. Mörk Víkings gerðu Guðmundur Magnússon (2), Guðmundu Steinn Hafsteinsson, Damir Muminovic og Heimir Þór Ásgeirsson. Næsti leikur var gegn Grundarfirði þar sem Víkingur hafði betur 6-3. Mörk Víkings gerðu Eyþór Helgi Birgisson, Heimir Þór Ásgeirsson, Guðmundur Magnússon, Steinar Már Ragnarsson (2) og svo varð Vignir Stefánsson fyrir því óláni að skora sjálfsmark. 

Síðasti leikur mótsins var gegn Fylkismönnum og úr varð nokkurskonar úrslitaleikur í mótinu því bæði lið höfðu unnið 2 leiki hvort. Víkingar voru mun sterkari í fyrri hálfleik og hefðu hæglega getað skorað 4 mörk í fyrri hálfleik. Víkingar fóru hins vegar tveggja marka forystu í leikhlé með mörkum frá Guðmundi Steini og Tomasz Luba. Fylkismenn sóttu í sig veðrið þegar líða tók á leikinn og náðu að minnka muninn í 2-1 og þar við sat. Guðmundur Magnússon hefði getað gulltryggt sigurinn undir lok leiksins en mistókst að vippa yfir Bjarna Þórð í marki Fylkis. Víkingar fara því með fullt hús stiga í seinni umferð riðlakeppninnar sem haldin verður í Fylkishöll 2. desember næstkomandi.

24.11.2012 21:06

Meistaraflokkur kvenna hjá Víking

Stofnfundur meistaraflokks kvenna undir merki Víkings

20. nóvember 2012 klukkan 15:06

Stofnfundur meistaraflokks kvenna á Snæfellsnesi var haldinn í íþróttahúsi Snæfellsbæjar í gær mánudaginn 19. nóvember. Alls mættu rúmlega 20 manns á fundinn, leikmenn, stjórn og áhugafólk um kvennaknattspyrnu á Snæfellsnesi. Stjórnina skipa Sveinn Þór Elinbergsson formaður, Kristinn Jónasson, Jónas Gestur Jónasson og Elínrós Jónsdóttir gjaldkeri.  Gunnar Örn Arnarson, framkvæmdarstjóri meistaraflokks karla VíkingsÓ, gegnir einnig því hlutverki í hinum nýstofnaða meistaraflokki kvenna.

Á fundinum var farið yfir grundvöll og markmið með stofnun meistaraflokks kvenna og þjálfari kynntur til sögunnar. Björn Sólmar Valgeirsson mun gegna stöðu þjálfara en hann þjálfar nú þegar lungað úr hópnum sem kemur til með að spila með liðinu. Stuttlega var farið yfir samningsmál auk þess sem málefnalegar umræður voru um hvað nafn liðið muni bera. Var það einróma álit fundarmeðlima að nota skyldi  nafn Víkings.

Um næstkomandi helgi taka stelpurnar þátt í futsal-móti sem haldið verður í Ólafsvík þar sem liðið etur kappi við Breiðablik, Val og Þrótt R.  Í kjölfarið verður gengið frá samningum við leikmenn auk þess sem æfingum verður fjölgað.

Við undirritun leikmannasamninga gefst kjörið tækifæri til myndatöku af hópnum.

Víkingur Ólafsvík

17.09.2012 22:44

Til hamingju Víkingur

Víkingur Ólafsvík tryggði sér í gær sæti í efstu deild á Íslandi þegar liðið vann glæsilega sigur á KA-mönnum frá Akureyri. Leikurinn fór rólega af stað og glöggt mátti sjá að mikið var undir hjá báðum liðum. Fyrrihálfleikur einkenndist af mikilli baráttu og lítið var um opin færi. Varnir liðanna voru vel á verði og tókst hvorugu liðinu að skora í fyrri hálfleik.

Síðari hálfleikur fór af stað líkt og sá fyrri þar sem liðin skiptust á að sækja án þess þó að taka óþarfa áhættur. Það var því ekki fyrr en á 75. mínútu er fyrsta mark leiksins leit dagsins ljós. Þar var að verki Edin Beslija með glæsilegri bakfallsspyrnu. Aðdragandinn að markinu var sá að varamennirnir Torfi Karl og Arnar Sveinn léku sín á milli á hægri kantinum sem endaði með góðri fyrirgjöf Arnars. Varnarmaður KA skallaði boltann beint um í loftið með þeim afleiðingum að Edin smellti knettinum með glæsibrag framhjá Sandor í markinu.

Við mark Edins virtist sem allar flóðgáttir hefðu opnast og þrjú mörk fylgdu í kjölfarið. Torfi Karl Ólafsson jók muninn í tvö mörk tíu mínútum síðar eftir glæsilegan undirbúning frá Arnari Svein. Arnar geystist upp kantinn í hraðri sókn og sendiboltann inn á markteig þar sem Torfi var mættur og átti í engum vandræðum með að leggja boltann í autt markið.


Tveimur mínútum síðar vann Helgi Óttarr boltann á miðjum vallarhelming okkar manna. Helgi braust upp völlinn á harða spretti, sendi inn fyrir á Eldar Masic sem rak knöttinn að teig KA-manna og lét vaða á markið. Knötturinn hafnaði í bláhorninu, óverjandi fyrir Sandor í markinu. Víkingar voru ekki hættir því í uppbótartíma rak Björn Pálsson smiðshöggið á glæsilegan sigur Víkings. Boltinn hrökk af varnarmönnum KA út fyrir teig þar sem Björn fékk nægan tíma til að hlaða í skotið sem var hnitmiðað í hornið nær.

Glæsilegur sigur Víkinga tryggði þeim sæti á meðal þeirra bestu árið 2013 og eru leikmenn ásamt þeim er standa að liðinu vel að því komnir. Á þar jafnt yfir þjálfara, stjórnarmenn og áhorfendur sem voru frábærir á Akureyri í gær.

                             

   


Tengt efni:
- Umfjöllun í Pepsi mörkunum (hefst 18:41) 
- Mörk leiksins á sporttv.is
- Myndaveisla fotbolta.net
- Umfjöllun 433.is
- Umfjöllun visi.is
- Umfjöllun mbl.is
- Myndir/Umfjöllun sport.is
- Íþróttafréttirnar á RÚV
- Íþróttafréttirnar á Stöð 2 
- Leiksskýrsla KSÍ 
- Ejub: Búið að vera gott sumar 
- Ótrúleg tilfinning 
- Umfjöllun SNB.is 
- Ejub: Lítill klúbbur með gott fólk
- Guðmundur Steinn: Pressan var á þeim 
- Hjólið undan rútunni hjá Ólafsvíkingum 

 

Víkingur Ólafsvík

17.09.2012 22:38

Lokahóf UMFG

Lokahóf Knattspyrnudeildar UMFG fór fram á dögunum

Besti leikmaður Grundarfjarðar 2012 var valinn Viktor Örn Jóhannsson

Efnilegasti leikmaður Grundarfjarðar 2012 var valinn Hilmar Orri Jóhannsson

Markahæstur var Heimir Þór Ásgeirsson með 21 mark en rétt í hælunum á honum var Ingólfur Örn Kristjánsson með 20 mörk.



Einnig var Viktor valinn leikmaður ársins af meðspilurum sínum. 

Sumarið 2012 var mjög fínt hjá okkur. Eftir hæga byrjun, þar sem við töpuðum fyrstu tveim leikjunum hrukkum við loks í gang og sigruðum næstu tvo leiki. Síðan mjötluðum við stigunum hægt og rólega inn og vorum alltaf í baráttunni um úrslitakeppnina. Með sigri á Kára hér heima í ágúst vorum við með pálmann í höndunum um að komast í úrslitakeppnina en fengum svo skell gegn Þrótti Vogum þar sem að þessi frægi pálmi var sleginn úr höndunum á okkur. Þar með þurftum við að treysta á hagstæð úrslit annara til að enda í öðru sæti. En hin liðin kláruðu sitt og því varð þriðja sætið okkar. 

Þá tók við hreinn úrslitaleikur um sæti í nýju þriðju deildinni og þar kláruðum við lið Léttis úr Breiðholti 6-1 eins og lesa má hér fyrir neðan..

Við þökkum velunnurum liðsins kærlega fyrir frábært sumar.
Skrifað af Tommi

10.09.2012 09:49

Hópferð á Akureyri

Vagn Ingólfsson, tók það verkefni að sér að skipuleggja rútuferð til Akureyrar fyrir stuðningsmenn Víkings. (Laugardaginn 15. sept).

Þeir sem hafa áhuga á að fara, vinsamlega hringið í Vagn og staðfestið. Fyrstir koma fyrstir fá. Nú þegar hafa 23 skráð sig. Það eru sæti fyrir 44. En það verður að vera full rúta til þess að dæmið borgi sig. Þetta mun kosta 4000 kr á manninn. Það verður einnig stoppað í Borgarnesi og náð í stuðningsmenn frá Reykjavíkursvæðinu. 

Ef þið ætlið með þá verðið þið að hringja í Vagn.867-7957.
Til þess að þetta gangi upp, þá þurfa allir að vera ákveðnir í að fara.
Víkingur Ólafsvík

10.09.2012 09:45

Er Víkingur að tryggja sig í úrvalsdeildina

20. umferð 1. deild karla lauk í dag með þremur leikjum. Aðeins tvær umferðir eru nú eftir af deildinni.

Víkingur Ólafsvík vann 1-0 sigur á ÍR. Þar með er ljóst að ÍR-ingar eru fallnir úr deildinni og munu leika í 2. deild á næsta tímabili.

Ólafsvíkingar eru komnir með annan fótinn upp í Pepsi-deildina en KA-menn eiga enn von um að fylgja Þórsurum upp. Í næstu umferð taka þeir á móti Víkingum og ef KA vinnur ekki þann leik fara Víkingar upp.



Víkingur Ólafsvík 1 - 0 ÍR
1-0 Guðmundur Magnússon ('35)

Frétt frá Fótbolta.net. Sjá alla fréttina: http://fotbolti.net/fullStory.php?id=133013#ixzz263hpP3EN

07.09.2012 23:05

UMFG leikur í 3 deild að ári

Við mættum liði Léttis í leik um laust sæti í þriðju deildinni í dag. Leikurinn var spilaður í Borgarnesi á hlutlausum velli.



Við byrjuðum leikinn mun betur og Golli kom okkur í 2-0 eftir þrjátíu mínútur. Danni kom okkur í 3-0 áður en Léttismenn minnkuðu muninn. Golli fullkomnaði svo þrennuna og kom okkur í 4-1 áður en dómarinn flautaði til hálfleiks. 



Í síðari hálfleik reyndu Léttismenn að koma sér inn í leikinn en Hemmi hálfpartinn slökkti þær litlu vonir sem þeir höfðu með marki á 50 mínútu og staðan því 5-1. Heimir Þór kláraði svo dæmið á 90 mínútu og leiknum lauk með stórsigri okkar 6-1.



Dabbi Wium var á vellinum með myndavélina og kunnum við honum bestu þakkir fyrir. Fleiri myndir í myndaalbúminu.

28.08.2012 21:54

UMFG í umspil um laust sæti í 3 deild

Sigur í síðasta heimaleik

Við fengum Hvíta Riddarann í heimsókn í síðasta heimaleik sumarsins. Þetta var leikur sem að skipti nánast engu máli því að við vorum öruggir með þriðja sætið og Hvíti Riddarinn hafði að engu að keppa nema heiðrinum. 



Við byrjuðum leikinn að krafti og það voru ekki liðnar nema 5 mínútur þegar að Heimir var búinn að koma okkur í 1-0 eftir góðann undirbúning frá Golla. Aðeins 10 mínútum síðar átti Tryggvi hörkuskot sem að fór í botninn á einum leikmanna Hvíta og þaðan í markið en við eignum Tryggva það fyrst að dómarinn gerði það enda var boltinn á leiðinni inn allan daginn. Staðan því 2-0 eftir 15 mínútna leik.



Eftir þetta fóru leikmenn Hvíta að sækja í sig veðrið og þeir minnkuðu muninn á 37 mínútu og staðan því 2-1 þegar að dómarinn flautaði til leikhlés.



Í síðari hálfleik komu leikmenn Hvíta mun grimmari til leiks og náðu að jafna leikinn á 55 mínútu. En þá hrukkum við í gírinn og Heimir kom okkur aftur yfir með góðu marki. Eftir það var þetta aldrei spurning. Golli og Danni bættu svo sitt hvoru markinu við og leikurinn endaði 5-2 fyrir okkur.



Nú er staðan í riðlunum klár og ljóst að við mætum feykisterku liðið Léttis næsta laugardag. Leikurinn verður spilaður á hlutlausum velli og verður það Skallagrímsvöllur í Borgarnesi. Leikurinn er semsagt þar kl 12:00 laugardaginn 1. september. Þetta verður hreinn úrslitaleikur um sæti í nýju þriðjudeildinni.

Fleiri myndir inni í myndaalbúminu.  
http://grundarfjordur.123.is/photoalbums/233274/
Skrifað af Tommi

28.08.2012 21:47

Úrslit í 4 flokk Íslandsmóts

Úrslitakeppni í 7 manna bolta fór fram á Ólafsvíkurvelli ( 4.flokkur)

27. ágúst 2012
Núna um helgina lauk úrslitakeppni hjá 4.flokki karla í 7 manna bolta á Ólafsvíkurvelli.
Það voru fjögur lið sem höfðu unnið sér sæti í úrslitum og voru sum hver komin langt að. Einherji frá Vopnafirði, Hamar frá Hveragerði, Skallagrímur frá Borgarnesi  og svo okkar strákar frá Snæfellsnesi.

Það var mikil spenna sem skein úr andlitum þessa hressu stráka þegar flautað var til leiks á laugardeginum. Strákarnir létu ekki smá kulda og rok á sig fá og sýndu oft á tíðum meistaratakta. Þegar leikjum dagsins var lokið á laugardeginum bauð foreldraráð strákanna af Snæfellsnesi upp á mat í mötuneyti skólans, og átu þessir kraft miklu strákar á sig gat. Því næst héldu hvert lið í sínar skólastofur og hvíldu sig fyrir átök morgundagsins.

Leikirnir á laugardeginum höfðu spilast þannig að Snæfellsnes og Skallagrímur háðu hreinan úrslitaleik um sigurinn á mótinu. Það fór svo að Snæfellsnes drengirnir sigruðu þann leik örugglega og stóðu uppi sem Íslandsmeistarar í 7 manna bolta í 4.flokki.

Það var svo Vigfús Örn Gíslason sem afhenti verðlaunin fyrir hönd KSÍ.

Framkoma og umgengi strákanna var til fyrirmyndar og má með sanni segja að þeir voru sínum félögum til sóma. 
Víkingur Ólafsvík

26.08.2012 08:07

Víkingur heldur 2 sæti

Töpuð stig eða unnið stig.

24. ágúst 2012 klukkan
1.deild
Leiknisvöllur
Föstudaginn 24.ágúst 2012

Leiknir R. - Vikingur Ó.   1-1   (0-1)

0-1 Arnar Sveinn Geirsson (11.mín)
1-1 Kristján Páll Jónsson (87.mín)

Mér finnst mjög erfitt að skrifa um þennan leik. Veit satt að segja ekki hvort þetta var góður leikur hjá okkur eða vondur. Aðstæðurnar á vellinum voru slæmar fyrir bæði lið, rigning og blautur völlur.

Fyrir leik var ég skíthræddur um það að við myndum lenda í erfiðleikum gegn Leikni. Í dag ákvað ég að skoða á heimasíðu KSÍ á hvaða dögum Leiknir væru grimmastir og þá kom í ljós að þeir hafa með leiknum í kvöld tekið 12 af 16 stigum sínum á föstudögum. Og við að spila við þá að föstudegi.

Leikurinn byrjaði vel fyrir okkur. Við unnum alla bolta og sóttum á þá. Það endaði með skrautlegu marki frá Arnari Sveini Geirssyni á 11.mín. Boltinn hafði viðkomu í stöng og fleiru og skrúfaðist rétt innfyrir línuna og færeysku dómararnir dæmdu boltann réttilega inni. 0-1 fyrir okkur og með öðru marki myndum við gjörsamlega ganga frá þeim. Annað markið væri of mikið fyrir Leikni að fá á sig eins og ástandið er á þeirra bæ. En okkur tókst bara ekki að setja annað mark, þrátt fyrir nokkra sóknartilburði. Einhvernveginn var það þannig að þegar menn voru komnir á auðan sjó að þá annaðhvort hægðu menn á sér til bíða eftir aðstoð og þá rann sóknin út í sandinn, í staðinn fyrir að sýna áræðni og ráðast á mark mótherjanna með skoti, hvort sem það yrði varið, færi framhjá eða yfir. Það skipti ekki máli því allar sóknarlotur eiga að enda með skoti á rammann.

Víkingur Ó spilaði sömu taktík og síðasta leik og voru grimmir í fyrri hálfleik, það grimmir að þeir voru á undan í flesta bolta og ég sá fyrir mér sigur í leiknum. Leiknir R. var í raun ekkert að gera í leiknum en hættulegustu sóknarlotur þeirra komu eftir langa bolta fram völlinn. Þeir áttu sennilega hættulegri færi en við sem þeir nýttu ekki. Guðmundur Steinn Hafsteinsson markahæsti leikmaður Víkings Ó í sumar spilaði ekki þennan leik vegna smávægilegra meiðsla og Torfi Karl Ólafsson var líka fjarri góðu gamni vegna veikinda og lá hann veikur í rúminu vestur í Ólafsvík. Hjá Leikni vantaði einnig einhverja leikmenn og man ég eftir Stefáni Jóhann Eggertssyni sem gerði markið í Ólafsvík fyrr í sumar.

Mikilll fjöldi áhorfenda var á leiknum og mikið af Ólsurum,  sem komu bæði að vestan og búsettir á höfuðborgarsvæðinu. Gaman var að heyra hvatningarsöngvana í leiknum og eftir leik fögnuðu allir sem einn leikmönnum Víkings Ó fyrir leikinn með lófaklappi. Það eru alltaf að sjást ný og ný andlit í stuðningsmannahópnum í hverjum leik.

Víkingur Ó var að spila langtímum saman ágætis bolta og voru heilt yfir sterkara liðið í leiknum. En þar sem annað markið kom ekki lifðu leikmenn Leiknis í voninni og má segja að á lokamínútunum fram að jöfnunarmarkinu hafi þeir bitið hressilega frá sér. Við áttum að vera búnir að klára þennan leik snemma í leiknum. En það er erfitt að fóta sig á hálum vellinum og boltinn spýtist mikið og það á við bæði liðin.

Eins og fyrirsögnin hér fyrir ofan vísar til, að þá gæti þetta jafntefli eða þetta eina stig sem vannst í kvöld skilað okkur endanlega í Pepsídeildina. En aftur á móti geta þessi tvö stig sem töpuðust verið þau stig sem okkur vantar uppá í lokin.

Tekið af bloggi Helga K
http://helgik.bloggar.is/blogg/473731/Topud_stig_eda_unnid_stig

26.08.2012 08:03

Öruggt hjá UMFG geng Snæfell

Þrettán mörk

Við kíktum í Hólminn og mættum Snæfell á Stykkishólmsvelli. Eitthvað virðast dönsku dagarnir hafa setið í þeim því að þeir sáu aldrei til sólar í þessum leik. Leikurinn endaði 13-0 okkur í vil. Heimir Þór skoraði 6 mörk, Golli var með 4 mörk, Tryggvi 1 mark, Pedja 1 mark og Runni 1 mark. 



Kári vann Þrótt Vogum örugglega og það þýðir að sæti í úrslitakeppninni er nánast runnið okkur úr greipum. Ólíklegt þykir að Kári tapi fyrir Snæfell en þeim nægir eitt stig til að tryggja sig. Það verður því okkar hlutskipti að lenda í þriðja sætinu og erum við öruggir með það óháð öðrum úrslitum. Það þýðir að við munum spila við þriðja sætið í A riðli um laust sæti í þriðju deildinni og eins og staðan er í dag er líklegast að það verði gegn Berserkjum.




Fleiri myndir inni í myndaalbúminu.
http://grundarfjordur.123.is/photoalbums/233007/

21.08.2012 14:34

Slæmt tap hjá Víking

Lang slakasti leikur okkar í háa herrans tíð.

17. ágúst 2012
1.deild
Valbjarnarvöllur
Fimmtudaginn 16.ágúst 2012 kl. 19.00


Þróttur R. - Víkingur Ó.   4-1 (0-0)

1-0 Halldór Arnar Hilmisson (49.mín)
2-0 Guðfinnur Þórir Ómarsson (61.mín)
2-1 Guðmundur Magnússon (68.mín, víti)
3-1 Halldór Arnar Hilmisson (69.mín)
4-1 Guðfinnur Þórir Ómarsson (82.mín)

Við erum ekki með gott lið ef við ætlum að spila leikina eins og við gerðum í seinni hálfleik gegn Þrótti. Fyrri hálfleikurinn var mun betri og jafnari en sá seinni hræðilegur. Ég velti því fyrir mér hvort leikmenn Víkings Ó hafi mætt í seinni hálfleikinn í hálfgerðu sjokki eftir að Emir Dokara samherji þeirra var fluttur á sjúkrahús eftir hryllilegan árekstur við einn sóknarmann Þróttar á lokamínútu fyrri hálfleiks og bara gátu ekki spilað meiri fótbolta þetta kvöld, en urðu að klára leikinn. A.m.k. sagði einn erlendu leikmannanna hjá okkur það að hann hefði orðið skelfingu lostinn og dauðhræddur við að sjá Emir liggja rotaðann og hálf lífvana á vellinum. Hann hélt að hann væri að deyja. Þetta var hrikaleg stund fyrir þá sem næstir voru. En sem betur fer rankaði Emir úr rotinu og var leiddur útaf vellinum beint upp í sjúkrabíl og menn biðu eftir að heyra hvernig honum reiddi af. Sem betur kom í ljós að hann var ekki mikið slasaður og þurfti að sauma fjögur spor í höfuð hans. Síðan smám saman náði hann sér og var orðinn nokkuð sprækur við brottförina vestur til Ólafsvíkur. Ég sendi honum batakveðjur.

En leikurinn byrjaði á rólegu nótunum. Bæði liðin þreifuðu á hinu og smám saman kom meiri hraði í leikinn. Hvorugt liðið skoraði mark í fyrri hálfleik. Þróttur var næst því þegar Einar varði aukaspyrnu alveg niðri í hægra horninu og Víkingur Ó komst næst því þegar Guðmundur Steinn skallaði boltann framhjá stönginni ódekkaður og einn og yfirgefinn nálægt markinu.

En síðan kom seinni hálfleikurinn sem tapaðist illa og gerði úrslit leiksins að verstu úrslitum okkar síðan við töpuðum illa 1-6 á heimavelli gegn Selfossi haustið 2009. Það eru tæp þrjú ár síðan við fengum svona slæm úrslit síðast. Það versta við þetta fannst mér að vera búinn að ná ákveðnum manni á völlinn að sjá Víking Ó spila og hann gafst upp og lét sig hverfa þegar 15 mínútur voru búnar af seinni hálfleiknum. Hann kom í hálfleik. Hann sagði "ég hef miklu meira við tímann að gera en að horfa uppá þetta". 

Það neikvæða við þetta er það að við erum búnir að vera í svo miklum sjens að koma okkur lengra frá hinum toppliðunum í deildinni og okkur hefur mistekist það. Ef við náum verri árangri en við viljum í sumar þá munum við blóta því í allan vetur. Við munum sjá eftir því að hafa ekki gert betur. Liðið okkar í dag getur skráð sig í sögubækurnar hjá Víking Ó. Ef þeim tekst að komast uppí Pepsídeildina sem ég tel alls ekki óraunhæft, þrátt fyrir þennan leik, verður leikmannanna okkar í dag, alltaf minnst með hlýhug og virðingu í framtíðinni. Það voru þeir sem komu liðinu upp í fyrsta sinn. Líkt og 1974 liðið sem kom okkur fyrst uppí 2.deildina (1.deildin í dag). Það vita allir stuðningsmenn Víkings Ó hverjir skipuðu það lið. 

Það jákvæða sem hægt er að taka útúr þessu er það að Þór Akureyri hirti toppsætið af okkur í kvöld og þar með minnkar pressan á okkur og þá verða þeir liðið sem allir vilja vinna! En það er enginn heimsendir. Staða okkar er ennþá virkilega góð og nú verðum við að fara að safna stigum í viðbót. Við erum búnir að vinna marga frækna sigra í sumar sem fögnuðum innilega. Við megum ekki gera lítið úr þeim sigrum með dapri frammistöðu það sem eftir er móts. Það er núna sem við eigum að gefa allt í og uppskera.

Nú legg ég til að við setjum upp 6 leikja mót og reynum að fá sem flest stig eða að setja upp ímyndaða bikarkeppni þar sem við reynum að komast í ímyndaðan úrslitaleik.

 

Í raun varð ég ekkert svekktur með þetta tap. Þróttur átti þennan sigur skilið og þeir spiluðu vel og notuðu mikið líkamsyfirburðina sína. Þegar við mætum svona sterku liði líkamlega er svarið að sleppa löngum boltum og spila boltanum með jörðinni og láta þá hlaupa. Þeir hafa fleiri kíló á skrokknum og þreytast þess vegna fyrr.
 
Þrír bestu leikmenn Víkings Ó í leiknum að mínu mati eru, Helgi Óttarr Hafsteinsson, Edin Beslija fyrir að fiska víti og Guðmundur Magnússon fyrir markið. Í raun var mjög erfitt að finna þrjá góða leikmenn í leiknum nema Helga Óttarr sem spilaði best.

Næsti leikur er á heimavelli gegn Haukum á þriðjudagskvöldið. Þá fær liðið stórkostlegt tækifæri til að sýna knattspyrnuhreyfingunni og okkur stuðningsmönnum Víkings Ó að tapið gegn Þrótti var slys.

En þessum leik gegn Þrótti skulum við gleyma sem allra fyrst. Látum eins og hann hafi aldrei verið spilaður og einbeitum okkur að næsta leik gegn Haukum.

HSH

Nafn:

Héraðssamband Snæfellsnes og Hnappadalssýslu

Farsími:

865-0294

Afmælisdagur:

24 september 1922

Heimilisfang:

Sólvellir 3. 350 Grundarfirði

Staðsetning:

Snæfellsnes

Heimasími:

436-1635

Önnur vefsíða:

umfi.is

Kennitala:

620169-5289

Bankanúmer:

0191-15-370322

Tenglar

Flettingar í dag: 1981
Gestir í dag: 44
Flettingar í gær: 847
Gestir í gær: 55
Samtals flettingar: 3292454
Samtals gestir: 253526
Tölur uppfærðar: 17.1.2018 10:10:10
Flettingar í dag: 1981
Gestir í dag: 44
Flettingar í gær: 847
Gestir í gær: 55
Samtals flettingar: 3292454
Samtals gestir: 253526
Tölur uppfærðar: 17.1.2018 10:10:10