Héraðssamband Snæfellsnes og Hnappadalssýslu

Flokkur: Körfubolti

08.03.2012 14:52

Tap gegn Njarðvík


Margir vildu gefa Snæfelli sigurinn þar sem Shanae Baker-Brice, besti leikmaður Njarðvíkur var ekki með í kvöld vegna meiðsla og þá helsta verkefnið að stoppa hina spræku Lele Hardy sem var reyndar á allt öðru máli og fór hamförum yfir Snæfellsliðið með 48 stig og 21 frákast og 8 stoðsendingar í 97-92 sigri Njarðvíkur. 

 

Það var engin leið að koma böndum á Hardy sem skoraði um 50% stiga Njarðvíkur en næst henni var Petrúnella með 15 stig. Hjá Snæfelli var Kieraah Marlow með 22 stig og fimm leikmenn Snæfells skoruðu yfir 14 stig en dugði ekki til. Þrátt fyrir meiðsli spilaði Alda Leif með og ánægjuefni ef hún verður í standi til að spila út tímabilið en það er mikil keppni um að ná inn í topp 4 og er Snæfell sem stendur í 3ja sætinu en með Hauka og KR hungraðar í úrlitakeppnina.

 

Tölfræði leiksins

Meira um leikinn á Karfan.is

04.03.2012 11:01

Snæfellsstúlkur að tryggja sig í úrslit?

Stórsigur hjá Snæfellsstúlkum

 

Snæfell og Hamar mættust í Stykkishólmi og fyrir leikinn var Snæfell í þriðja sæti deildarinnar með 26 stig en Hamar í sjöunda sæti og því næst neðsta með 12 stig. Hamar hafði sigur þegar þessi lið mættust síðast í Hveragerði og því áttu Snæfellingar harma að hefna.


Jafnræði var með liðunum fyrstu mínúturnar en Snæfellingar tóku þó snemma frumkvæðið og höfðu framan af nauma forystu. Um miðbik fyrsta fjórðungs kom góður kafli hjá Snæfellingum og komust þær í 18-6 en þá höfðu þær hvítklæddu gert 9 stig í röð.

 


 


Snæfell spilaði nokkuð ákveðna maður á mann vörn og Hvergerðingar komust lítt áleiðis. Þær reyndu mikið af langskotum og áttu erfitt með að sækja að körfu Hólmara. Hamarskonur komu þá eilítið til baka og var staðan eftir fyrsta leikhluta 22-14 Snæfellingum í vil. Hjá Snæfelli var Jordan Murphree komin með 7 stig og Kieraah Marlow 6 en hjá Hamri var Katherine Graham með 5 stig og Marín Laufey Davíðsdóttir með 4.


Jordan Murphree opnaði annan leikhluta með þriggja stiga körfu, hennar þriðju i leiknum. Sóknarleikurinn var skipulagðari hjá Hamri og vörnin betri. Í stöðunni 31-23 tók Snæfell svo góðan sprett og komust í 41-23 en þá svaraði Hamar loks fyrir sig með tveimur stigum úr vítaköstum. Jordan Murphree var í miklu stuði en hún var búin að setja niður 5 þrista úr 6 tilraunum. Snæfellingar gerðu svo gott sem út um leikinn í lok annars leikhluta en þegar blásið var til leikhlés  var staðan orðin 46-25 og á brattan að sækja fyrir þær bláklæddu.


Stigahæstu leikmenn í liði Snæfells voru Jordan Murphree með 19 stig og 7 fráköst og Kieraah Marlow með 12 stig og 6 fráköst. Í liði Hamars var Katherine Graham með 8 tig og Marín Laufey Davíðsdóttir með 6 stig.

 


 

Hamarskonur byrjuðu þriðja leikhluta af krafti og setti Fanney Guðmundsdóttir niður tvær þriggja stiga körfur. Snæfellskonur hleyptu Hamarskonum þó aldrei of nærri sér og hélst munurinn þetta 18-20 stig. Hvergerðingar réðu illa við Marlow undir körfunni og svo var Jordan sjóðheit fyrir utan en hún var komin með 8 þriggja stiga körfur úr 10 tilraunum. Staðan eftir þriðja leikhluta var 67-43.

 

Hvergerðingar neituðu að gefast upp og skoruðu fyrstu þrjú stig fjórða leikhluta. Þær reyndu að pressa Snæfellinga hátt en sú pressa gekk þó ekki alveg sem skyldi og fór munurinn sjaldnast undir 20 stig. Leikurinn fjaraði fljótt út og fór svo að allir leikmenn beggja liða fengu að spreyta sig nema Alda Leif hjá Snæfelli sem sat sem fastast en hún var tæp fyrir leikinn vegna liðþófameiðsla í hné.

 


 

Svo fór að lokum að Snæfell vann öruggan sigur 87-56 og situr sem fyrr í þriðja sæti deildarinar og Hamar í því sjöunda.

 

Í liði Snæfells átti Jordan Murphree stórleik en hún skoraði 28 stig og tók 11 fráköst. Þriggja stiga hittni hennar var líka frábær en hún skoraði 8 þriggja stiga körfur úr 10 tilraunum. Kieraah Marlow var einnig sterk í liði Snæfells en hún skoraði 20 stig og tók 10 fráköst. Hildur Kjartansdóttir var svo með 10 stig og aðrar minna.

 

Hjá Hvergerðingum var Katherine Graham með 16 stig, Fanney Guðmundsdóttir var með 13 sitg og Marín Laufey Davíðsdóttir með 12 stig og 10 fráköst.

 

Nánari tölfræði af vaf KKÍ

 

Umfjöllun og myndir:
Þorsteinn Eyþórsson


 


04.03.2012 10:59

Naumt tap í Keflavík


Ekki var hægt að hafa tæpara tapið gegn Keflavík eftir framlengdann leik 101-100 í Toyotahöllinni. Ólafur Torfason jafnaði leikinn 93-93 af vítalínunni og setti leikinn í framlengingu. Leikurinn heilt yfir var jafn og gat dottið beggja megin. Snæfell var naumt yfir í hálfleik 38-42. Stigahæstir hjá Snæfelli voru Marquis Hall með 25 og Pálmi Freyr með 23. Fínn leikur þrátt fyrir tap og ekki hvaða lið sem er sem skorar 100 stig í Keflavík og eigum við fullt erindi í efstu liðin en deildin er jafnari sem aldrei fyrr, bara spurning um þetta litla extra hvar sigurinn dettur undir lokin greinilega.

 

Tölfræði leiksins

Umfjöllun af Karfan.is

26.02.2012 23:33

Til hamingju stúlkur


Eftir stórleik gegn Val sigraði Snæfell 58-61 þar sem Berglind Gunnarsdóttir var valin leikmaður leiksins.

Glæsilegur árangur hjá stúlkunum og óskum við þeim innilega til hamingju með bikarinn.

 

Umfjöllun hérna af karfan.is

24.02.2012 15:20

Tap gegn Stjörnunni

Snæfell missti niður fína forystu

 

Stjörnumenn byrjuðu á fyrstu fimm stigum leiksins þar með töldum góðum þrist frá Marvin en Sveinn Arnar tók þá næstu fimm fyrir Snæfell og staðan 5-5 í upphafi. Þaðan stökk Snæfell af stað og komst í 17-8 þar sem Quincy sýndi tvær troðslur aðra eftir stolinn bolta og eina með "alley-oop". Stjörnumenn virkuðu einbeittir fyrst mínúturnar en sóknarleikur hökti nokkuð fljótlega og var lítið flæði þar sem Snæfellsmenn tóku svo fráköstinn og stálu boltum.



Marquis stoppaði Justin mjög vel og Sveinn Arnar var einkar harður í vörninni. Þegar Stjarnan nálgaðist 19-14 tók Snæfell sig til og komst í 29-14 með þristum frá Ólafi og Marquis og eina troðslu frá Quincy og var það staðan eftir fyrsta hluta og ótrúlega linir Stjörnumenn mættir í Hólminn en Keith Cothran var þeirra hressastur.

 



Snæfell hafði tekið 15-0 í 32-14 og gott forskot strax í upphafi annars hluta . Stjörnumenn fóru að síga nær með betri vörn og Snæfellsmenn voru óskipulagðir í sóknum sínum. Stjarnan komst nær 39-26 og virtust ætla að taka góð áhlaup. Snæfell hélt þó sjó en tæknivillur á Renato hjá Stjörnunni og Nonna Mæju hjá Snæfelli vegna mótmæla litu dagsins ljós. Ekki komust Stjörnumenn að gera sér mat úr áhlaupunum þrátt fyrir tilraunir og Snæfell hélt forystunni í hálfleik 49-36.



Í hálfleik voru þeir frændur Quincy og Marquis með 13 stig hvor og Sveinn Arnar 8 stig hjá Snæfelli. Hjá Stjörnunni var Keith Cothran með 12 stig. Justin og Renato voru með 8 stig hvor. Marvin Valdimarsson var farin útaf meiddur eftir samstuð í fyrri hálfleik en virtist ekki alvarlegt þó hann kæmi ekki meira inn á.

 

 


Snæfell mátti hafa sig alla við í uppahafi seinni hálfleiks en Stjarnan sótti á með þrist frá Fannari Frey 52-43 og Snæfellsmenn voru við svæðið vörninni. Nonni Mæju lagaði stöðuna með þremur til svars 55-43. Jovan Zdravevski kom þá sterkur inn með þrist og víti í kaupbæti. Renato og Keith bættu við fjórum og Stjörnumenn höfðu unnið sig uppí þriggja stiga mun 55-52 þar sem þeir voru að stela boltum og spila feikna góða vörn.



Líkt og taflið hefði algjörlega snúist við og Stjarnan vann þriðja hluta 20-12. Snæfell misstu ekki hausinn og héldu forystunni 61-56 fyrir fjórða fjórðung en leikurinn var orðinn jafnari og skemmtilegur.



Þegar tveimur stigum munaði á liðnum 61-59 í upphafi fjórða hluta fékk Pálmi Freyr að líta tæknivillu fyrir mótmæli og Justin jafnaði á línunni 61-61 og Stjarnan fékk boltann sem færði Jovan hann í hendur og þristurinn steinlá 61-64. Quincy fékk svo sína 5. villu í tæknivillurformi en lítið virtist svigrúmið hjá dómurum leiksins en Snæfell voru farnir að einbeita sér minna að leiknum og meira að pirra sig á því að Stjarnan fengu að berja sig áfram án refsinga.

 



Stjörnumenn komust yfir 64-70 og munaði heldur betur um Jovan Zdravevski sem minnti á sig og er gríðalega miklvægur hlekkur í Stjörnukeðjunni. Nonni fékk sína fimmtu villu um miðjann leikhlutann og Stjarnan yfir 68-71 og Sveinn Arnar fór sömu leið stuttu seinna. Stjörnumenn nýttu sér að Snæfell veiktist við þetta og komust í 68-75 sem Snæfell vann reyndar upp 75-77 með hörku vörn og fjórum stigum frá Ólafi Torfasyni.



Ólafur átti svo stolinn bolta þegar um mínúta var eftir en Snæfell nýtti ekki sóknir sínar og Óli þurfti að brjóta með 13 sekúndur eftir og fékk sína fimmtu villu. Keith setti niður tvö víti og staðan 75-79. Jovan setti svo lokastigið af vítalíunni fyrir Stjörnuna sem sigruðu 75-80, náðu að snúa leiknum sér í hag og ná mikilvægum sigri.

 

Tölfræði leiksins



Snæfell:
Ólafur Torfason 15/7 frák. Sveinn Arnar Davíðsson 13/5 frák. Quincy Cole 13/5 frák/5 stoðs/4 stolnir. Marquis Hall 13/5 frák. Jón Ólafur Jónsson 8/4 frák. Pálmi Freyr Sigurgeirsson 7/8 frák/4 stoðs. Hafþór Ingi Gunnarsson 6. Þorbergur Helgi Sæþórsson 0. Óskar Hjartarson 0. Magnús Hjálmarsson 0. Snjólfur Björnsson 0.


Stjarnan:
Keith Cothran 19/6 frák. Justin Shouse 18/6 frák/7 stoðs. Renato Lindmets 13/11 frák/5 stoðs. Jovan Zdravevski 12. Fannar Freyr Helgason 8. Guðjón Lárusson 6/5 frák. Marvin Valdimarsson 3. Dagur Kár Jónsson 1. Magnús Bjarki Guðmundsson 0. Sigurbjörn Ottó Björnsson 0.



    Punktar:

    Quincy Hankins Cole og Marquis Hall hjá Snæfelli skoruðu ekki stig í seinni hálfleik.
    Fjórir leikmenn Snæfells fóru útaf með fimm villur í fjórða hluta.
    Þrjár tæknivillur fór á Snæfell fyrir mótmæli en ein á Stjörnuna í leiknum.
    Stjarnan átti 17% nýtingu í þristum 3 af 18 en Snæfell 32% 10 af 31.
    Jovan Zdravevski átti tvo af þristunum þremur á einkar mikilvægum kafla.
    Snæfell heldur 6. sætinu en Stjarnan fer úr 4. í 2. sætið eftir leikinn.
    Dómarar voru Sigmundur Már Herbertsson og Björgvin Rúnarsson

Umfjöllun: Símon B. Hjaltalín.
Myndir: Þorsteinn Eyþórsson.

 

23.02.2012 07:29

Háspennuleikur í hólminum

100.000 volt í Hólminum: Snæfell pressar á úrslitakeppnissætið.



Snæfell komust í 24 stig í deildinni eftir 77-75 sigur á Haukum í æsispennandi leik í Hólminum og eru nú jafnar KR og Haukum sem raðast í þriðja, fjórða og fimmta sætið í Iceland express deild kvenna. Þessi þrjú lið eru í mikilli baráttu um fjórða sætið og hafa Snæfellsstúlkur sótt fast að.



Alda Leif opnaði reikninginn í leiknum með þriggja stig körfu og Snæfell komst í 5-2 en Haukar jöfnuðu 5-5. Leikurinn var jafn í fyrsta hluta og liðin skiptust á að skora en í stöðunni 13-12 fyrir Snæfell tóku Haukar góðar sóknir og komust fljótt í 13-18 og svo 15-22.  Íris Sverrisdóttir hélt uppi sóknarleik Hauka það sem af var ásamt Jence Ann Rhoads en Haukar leiddu 18-25 eftir fyrsta leikhluta.



Snæfellsstúlkur létu ekki brjóta sig á bak aftur heldu héldu í Hauka sem voru þó skrefinu framar í öðrum hluta eða leiddu mest um 5 stig 22-27 en þá tók við rúmmur tveggja mínútna kafli í skot sem klikkuðu og varnarfráköst á víxl hjá báðum liðum. Það endaði með því að Kieraah Marlow smellti tveimur vítum niður og Björg Guðrún skellti þrist og Snæfell jafnaði 27-27.


Mikið spennandi og jafn leikur í boði á fjölunum í Stykkishólmi en eftir tæknivillu á Kieraah Marlow sem braut á Hope Elam komust Haukastúlkur yfir undir lok fyrru hálfleiks og staðan naum 35-38 fyrir Hauka.

 

 


Í hálfleik voru hjá Snæfelli Kieraah með 9 stig, Jordan 8 stig og Alda Leif 7 stig. Hjá Haukum var Íris Sverrisdóttir búin að vera gríðalega drjúg ogvar komin með 16 stig og næst henni var Jence Ann Rhoads með 8 stig og Hope Elam 6 stig.



Í þriðja hluta skiptist þetta í tvennt. Haukar héldu áfram að slíta sig frá Snæfelli sem virtust áttavilltar og ragar í sóknum sínum, vörnin gegnlek, Ingi Þór uppskar tæknivillu og Haukar komust í 10 stiga mun 39-49 og virtust allhressara liðið á vellinum og ekki skánaði útlitið þegar Hildur Sigurðardóttir lá meidd eftir á ökkla og var ekki meira með eftir miðjan þriðja hluta, þegar Ingi Þór bar hana í fangi sér að bekknum, en hún komst ekki á stigablaðið í leiknum.


Snæfell lagaði varnarleikinn og með góðri svæðisvörn lokuðu þær á Hauka sem klikkuðu á langskotum og sendu leikmenn Snæfells oft á vítalínuna sem skilaði gríðalega góðum stigum í hús fyrir þær. Jordan og Hildur Björg rifu niður öll laus fráköst og gáfu í.



Hope Elam fékk tæknivillu fyrir að fagna ákaft að dæmt var á Hildi Björgu sem braut á Írisi Sverrisdóttur í þriggja stiga skoti. Íris setti tvö niður og Alda setti bæði niður vegna tæknivillunnar. Dýrt fagn þar fyrir Hauka þar sem staðan varð 56-57 og Snæfell náði að brúa gjánna sem hafði myndast en Jordan Murphree kom sjóðheit með stemminguna undir lok þriðja hluta og setti þrjú stig sem kom Snæfelli yfir 59-57 og kláraði tvö víti niður sem skilaði Snæfelli forystu 61-59 fyrir lokafjórðunginn.



Hátt í tvær fyrstu mínúturnar fóru mest í að Snæfell dritaði á körfuna með engum árangri en hirtu fráköstin þó á meðan og Haukastúlkur horfðu á. Leikurinn fór þá að rúlla og 100.000 volt voru í salnum þar sem liðin voru að skiptast á að jafna og taka tveggja stiga forystu og algjörlega óþarft að virkja strauma Breiðafjarðar þegar svona leikir eru til staðar.

 



Bæði lið reyndu nokkrar utan þriggja stiga línu með slökum árangri en þegar jafnt var 72-72 setti Kieraah niður tvö víti og staðan 74-72 sem Jence Rhoads jafnaði 74-74 en Kieraah kom Snæfelli í 76-74 áður en hún fór útaf með fimm villur og 20 sekúndur eftir en þetta var einungis þriðja liðsvilla Snæfells og ekki komin skotréttur.


María Lind hitti úr öðru víti sínu fyrir 76-75 og Björg Guðrún brunaði upp völlinn þar sem Guðrún Ámundardóttir braut óíþróttamannslegri villu og Björg setti annað vítið niður sem reyndist síðasta stig leiksins og Snæfell sigraði 77-75 en lokaskot Hauka frá Jence Ann Rhoads geigaði og þakið rifnaði af húsinu, svo einfalt er það.

 

Tölfræði leiksins


Snæfell:
Kieraah Marlow 26/8 frák. Jordan Murphree 21/10 frák/4 stoð/4 bolta náð. Alda Leif Jónsdóttir 11. Hildur Björg Kjartansdóttir 8/11 frák. Helga Hjördís Björgvinsdóttir 5. Björg Guðrún Einarsdóttir 4. Ellen Alfa Högnadóttir 2. Hildur Sigurðardóttir 0. Berglind Gunnarsdóttir 0. Sara Mjöll Magnúsdóttir 0.


Haukar:
Íris Sverrisdóttir 24/6 frák. Hope Elam 16/9 frák/4 stoðs/3 boltum náð. Jence Ann Rhoads 16/8 stoðs. Guðrún Ósk Ámundardóttir 6. Margrét Rósa Hálfdánardóttir 6. María Lind Sigurðardóttir 3. Kristín Fjóla Reynisdótti 2. Auður Íris Ólafsdóttir 2. Sara Pálmadóttir 0. Ína Salóme Sturludóttir 0.



  • Punktar:


    Snæfell var með lakari skotnýtingu eða 39% gegn 42% Hauka
    Það voru vítaskotin sem Snæfell nýtti vel en þær voru oft sendar á línuna og voru með 86% nýtingu 25 af 29 niður
    Haukar voru með 7 af 9 niður í vítum 78%
    3 tæknivillur og 1 óíþróttamannsleg villa komu upp í leiknum þar sem taugarnar voru þandar í mikilvægum leik fyrir bæði lið
    Dómarar voru þeir Halldór Geir Jensson og Kristinn Óskarsson



Umfjöllun: Símon B. Hjaltalín

Myndir: Þorsteinn Eyþórsson

 

21.02.2012 20:47

Titilvörn framundan hjá Snæfellsstúlkum



Snæfell komst í úrslit í bikarkeppni unglingaflokks kvenna og geta því varið titilinn frá því í fyrra. Stúlkurnar sigruðu Hauka 60-46 í undanúrslitaleik í Stykkishólmi og spila allar nema ein sinn annan bikarúrslitaleik á viku, en þær spila einnig með meistaraflokki sem lék til úrslita um síðustu helgi.



Snæfell var yfir eftir fyrsta leikhluta 15-11 en Haukar höfðu gefið í og jafnað 9-9 eftir fína byrjun Snæfells.

 


 

Annar leikhluti var klárlega banabiti fyrir Haukastúlkur sem skoruðu einungis þrjú stig gegn átján stigum Snæfells en Aníta Rún smellti fimm stigum í röð fyrir Snæfell sem fóru fljótt úr 17-14 í 33-14 og skoruðu 16-0 yfir mestann hluta annars fjórðungs og sú var staðan í hálfleik. Hildur Björg var að spila flottann leik í vörninni og tók nánast flest fráköst sem i boði voru.



Í Snæfelli voru allar sjö að skila framlagi en stigahæstar voru Ellen Alfa 9. Hildur Björg 8 og 8 fráköst. Björg Guðrún 7.
Hjá Haukum voru þær Lovísa og Margrét búnar að skora 7 stig hvor og ljóst að liðið þyrfti að finna sig betur saman.

 


 

Eftir fimm mínútur af þriðja hluta voru liðin búin að skora lítið eða 3-4 fyrir Hauka og staðan 36-18 en í stöðunni 41-23 var um mínúta eftir og fór þá Haukavélin í gang og kraftur liðsins kom í ljós. Þær skoruðu 9-0 síðustu mínútuna og ætluðu ekki að gefa leikinn svo auðveldlega eftir þar sem þær Sólrún, Lovísa, Auður og Margrét tóku góðar sóknir og 9 stiga munur var fyrir lokafjórðunginn 41-32 fyrir Snæfell sem tapaði leikhlutanum 8-18.

 


 

Ellen Alfa setti í fimmta gírinn og skoraði 13 stig í fjórða hluta ásamt því að stela 4 boltum og var Haukunum gríðalega erfið í vörninni. Ellen smellti þrist straxí upphafi og Berglind Gunnars fylgdi henni með öðrum til áður en Ellen setti svo annan og staðan fljótt orðin 52-36 fyrir Snæfell. Haukar áttu þó fínann 9-0 sprett til að svara sterkri byrjun Snæfells í leikhlutanum úr 57-38 í 58-46.



Klukkan tifaði þó á meðan eins og gengur og áhlaup sem slíkt kom of seint til að þær gætu gert leik úr þessu og Ellen bætti við tveimur stigum eftir stolinn bolta og Snæfell sigraði 60-46 og spila í úrslitum gegn Val.

 


 

Úrslitaleikurinn verður laugardaginn 25. febrúar kl 16:00 í Vodafonehöllinni þar sem bikarúrslit yngri flokka verða um helgina.

 


 

Snæfell:
Ellen Alfa 25/7 frák/5 stolnir. Hildur Björg 11/19 frák/6 stoðs. Björg Guðrún 7/6 frák/5 stoðs. Sara Mjöll 5/10 frák. Berglind Gunnarsd 5/3 frák. Aníta Rún 5/3 frák. Rebekka Rán 2.



Haukar:
Margrét 15/4 frák/5 stoðs. Lovísa 11/12 frák. Sólrún 10/6 frák. Auður 8/4 frák/5 stolnir. Inga Dís 2/3 frák. Ína, Hafdís, Guðrún, Andrea, Kristjana og Eydís skoruðu ekki.



Umfjöllun: Símon B. Hjaltalín

Myndir: Þorsteinn Eyþórsson

 


20.02.2012 15:32

2 sætið staðreynd í bikarnum

Silfrið í okkar hlut og stúlkurnar á spjöld bikarsögu kvenna.

 

Snæfellsstúlkur fengu silfur eftir að hafa beðið lægri hlut í bikarúrslitaleik kvenna 84-77 gegn Njarðvík. Stúlkurnar mega vera stoltar af sínum árangri því ekki hefur kvennalið Snæfells farið áður í úrslitaleikinn í Höllinni og því komnar í nýjar hæðir á spjöldum bikarsögunnar.

 

Ekki verður farið nánar í leikinn hérna en set tengla hér fyrir neðan á umfjöllun frá karfan.is. Ljóst var þó að naumt var það undir lokin þar sem Snæfell gafst aldrei upp og gerðu þetta að alvöru bikarleik.

Þá ber að þakka glæsilegann stuðning og hvatningu okkar stuðningsfólks sem mætti og sýndi alvörutakta á áhorfendapöllunum, ómetanlegt. Þakkir einnig til allra styrktaraðila sem gáfu kraft í okkar starf í kringum þennan mikla viðburð hjá okkur.

 

Umfjöllun af karfan.is

Tölfræði leiksins af vef KKÍ

Myndasafn af karfan.is nr 1

Myndasafn af karfan.is nr 2

Myndasafn af karfan.is nr 3

Viðtöl á KarfanTv

 


 

-sbh-

Myndir: Þorsteinn Eyþórsson

17.02.2012 06:49

Fimmti sigur í röð

Snæfell sigraði í Njarðvík

 

Stelpurnar í unglingaflokki unnu sinn fimmta leik í röð í kvöld þegar þær heimsóttu Njarðvík í Ljónagryfjuna, lokatölur 64-73.  Hildur Björg Kjartansdóttir var stigahæst með 27 stig.


Berglind Gunnarsdóttir var í búning en var ekki leikfær, Björg Guðrún sem meiddist á hné var "teipuð" og var tilbúin að spila.  Stelpurnar voru átta mættar og ætluðu sér sigur til að eiga möguleikan á að komast í úrslitakeppnina, en fjögur efstu liðin leika í kross í lok tímabils.  Fyrir leikinn voru Njarðvík númer fjögur með tíu stig en Snæfell í fimmta sæti með átta stig.

 

Byrjunin var góð hjá Snæfell sem komust í 0-6 og 3-16, en Njarðvík hikstuðu gegn svæðisvörninni.  Hildur Björg stýrði liði Snæfells og leiddu Snæfell 13-20 í lok fyrsta leikhluta.  Njarðvík jöfnuðu leikinn 20-20 og komust yfir 23-22.  Mestri forystu náðu Njarðvík 30-26 en góður varnarleikur snéri taflinu við og magnaður kafli frá Hildi Björgu komu Snæfell í 32-35 áður en tvö víti fóru niður hjá heimastúlkum og staðan í hálfleik 34-35.  Rebekka Rán og Silja Katrín komu innaf bekknum en Silja snéri sig á ökkla og kom því lítið við sögu í leiknum.

 

Í þriðja leikhluta komu þrjár þriggja stiga körfur frá Björg Guðrúnu og Snæfell leiddu 40-49. Svæðisvörnin gaf eftir nokkur opin skot sem Njarðvík nýttu sér og var staðan í lok þriðja leikhluta 48-51.  Sara Mjöll og Ellen Alfa stigu uppí fjórða leikhluta og varnarleikurinn þéttist,  staðan 53-59 þegar þristur frá Njarðvík kom stöðunni í 56-59.  Hildur Björg náði þá sóknarfrákasti og jók muninn í 56-61. Björg Guðrún smellti svo stórum þrist og Sara Mjöll skoraði eftir flott samspil, staðan 58-66.  Ellen Alfa skoraði stórar körfur og innsiglaði sigurinn 64-73.

 

Stelpurnar stóðu sig mjög vel og náðu mjög góðum sigri, þær stóðust álagið og léku jafnan og góðan leik. 

 

Stigaskor Snæfells: Hildur Björg Kjartansdóttir 27, Björg Guðrún Einarsdóttir 18, Sara Mjöll Magnúsdóttir 15, Ellen Alfa Högnadóttir 11, Aníta Rún Sæþórsdóttir 2.  Rebekka Rán Karlsdóttir og Silja Katrín Davíðsdóttir léku en skoruðu ekki.

 

Stigaskor Njarðvíkur: Eyrún Líf Sigurðardóttir 15 stig, Ína María Einarsdóttir 8, Ásdís Freysdóttir, Sara Margeirsdóttir, Guðlaug Júlíusdóttir og Erna Hákonardóttir skoruðu allar 6, Aníta Carter og Andrea Ólafsdóttir 4, Marín Magnúsdóttir 3. Eygló Alexander og Guðbjörg Einars skoruðu ekki.

 

Næsti leikur hjá Snæfellsstúlkum er gegn Haukum í undanúrslitum bikarkeppni KKÍ, mánudaginn 20. Febrúar klukkan 20:00 í íþróttahúsinu í Stykkishólmi.

15.02.2012 14:31

Pæjur úr Snæfell á Póstmóti Breiðabliks

Pæjur úr 2-4 bekk sem tóku þátt í Póstmóti

Á sunnudeginunm29. Janúar voru nokkrar pæjur úr 2-4 bekk sem tóku þátt í Póstmóti Breiðabliks sem haldið var í Smáranum. Það voru Dagný Inga, Vaka, Viktoría, Heiðrún Edda og Sigrún Birta.

 

Stelpurnar spiluðu 3 leiki, þær spiluðu fyrst við Njarðvík, svo Hrunamenn og í lokin við Stjörnuna, og stóðu sig allar alveg svakalega vel! Þær voru rosalega ákveðnar og þorðu allar að taka af skarið, svo vantaði heldur ekki upp á brosið og gleðina hjá þeim =) Á mótinu fengu allir þátttakendur Buff og Medaliu  og voru mínar stelpur mjög sáttar með það!

 

Björg Guðrún Einarsdóttir

14.02.2012 14:54

Öruggt hjá Snæfell og úrslitaleikur framundan

Kvennalið Snæfells í fyrsta sinn í úrslitaleik bikarsins.

 

Stjarnan mætti í Hólminn í undanúrslitaleik Poweradebikar kvenna og þar tóku Snæfellssttúlkur á móti þeim. Bæði lið ekki komist svo langt áður og ljóst að fyrir leikinn yrðu ný nöfn í úrslitaleik bikarsins skrifuð í söguna úr þessum leik. Stjarnan er sem stendur í 2. sæti 1. deildar og Snæfell í 5. sæti Iceland express deildarinnar.


 




Ekki var að sjá í  lok fyrsta hluta og byrjun annars hluta mun á liðunum en Stjarnan barðist vel á meðan Snæfell slaknaði, hittu illa, misstu boltann oft klaufalega og staðan varð fljótt 27-21 þar sem Stjarnan nálgaðist hratt. Snæfell tók þá til sinna ráða og komust í 38-22 nokkuð þægilega. Stjörnustúlkur máttu þó eiga það að barátta einkenndi liðið og sýndu Snæfelli oft klærnar. Staðan í hálfleik var 45-29 fyrir Snæfell.

 


 


Hjá Snæfelli voru Hildur BJörg, Hildur Sigurðar og Kieraah komnar með 10 stg hver og bætti Hildur Sig við 5 fráköstum og 6 stoðsendingum. Guðrún Ósk Guðmundsdóttir var stigahæst hjá Stjörnunni með 9 stig og Bára Fanney bætti við 7 stigum. Heiðrún Ösp og Hanna Hálfdánardóttirkomu næst með 5 stig hvor og flest fráköstin hafði Andrea Pálsdóttir tekið eða alls 6 stykki.


Hildur Sigurðardóttir sá til þess að þetta yrðu lítil vandræði fyrir Snæfell í upphafi þriðja hluta og gekk fremst góðra Snæfellsstúlkna sem spiluðu Stjörnuna uppúr skónum og skildu þær eftir 66-33 áður Eggert þjálfari Stjörnunnar tók leikhlé til hvatningar sinna leikmanna sem höfðu annars staðið sig með sæmd. Staðan eftir þriðja hluta var farinn að skýra línurnar fyrir þennan annars hressandi leik 79-39.

 


 



 


Mikið af fólki var mætt á leikinn til að styðja Snæfell áfram og fleiri en oft áður hafa mætt á leiki og greinilega spenningur fyrir því að sjá hvort kvennaliðið færi loks í Höllina en karlalið Snæfells hefur farið þangað fjórum sinnum með 2 sigra og 2 töp og nú hefur kvennaliðið skrifa nafn sitt í bikarsöguna einnig og ljóst að það verður rauðmáluð hálf stúkan í Höllinnni af Hólmurum og stuðningsfólki Snæfells.

 


 


Snæfell:
Hildur Sigurðardóttir 22/10 frák/13 stoðs/5 stolnir boltar. Hildur Björg Kjartansdóttir 22. Alda Leif Jónsdóttir 15/9 frák/3 stoðs. Kieraah Marlow 12/5 frák. Jordan Murphree 12/4 stolnir boltar. Helga Hjördís Björgvinsdóttir 8/8 frák/4 stoðs/6 stolnir boltar. Sara Mjöll Magnúsdóttir 8. Ellen Alfa Högnadóttir 2. Aníta Rún Sæþórsdóttir 0/3 frák.


Stjarnan:
Bára Fanney Hálfdánardóttir 15/3 frák. Guðrún Ósk Guðmundsson 11/6 frák. Heiðrún Ösp Hauksdóttir 10/4 frák/4 stoðs. Andrea Pálsdóttir 7/8 frák. Hanna Hálfdánardóttir 7/3 frák. Bryndís Hanna Hreinsdóttir 5/4 frák. Sigríður Antonsdóttir 0. Lára Flosadóttir 0.

 

Tölfræði leiksins


Þetta verður þá rautt og grænt, Snæfell og Njarðvík í úrslitaleik Poweradebikar kvenna kl 13:30. Laugardaginn 18. febrúar í Laugardalshöllinni.


Umfjöllun: Símon B. Hjaltalín.
Myndir: Þorsteinn Eyþórsson.

 

13.02.2012 14:11

Körfuboltamót í Ólafsvík

 Um síðustu helgi var haldið minniboltamót 11 ára í Körfubolta í Íþróttahúsi Snæfellsbæjar. Þór Akureyri, Grindavík og Valur mættu að spila við Víking/Reyni í  C-riðli en fyrir mótið hafði Víkingur /Reynir unnið sig upp um tvo riðla. Fyrsti leikurinn var við Grindavík, en Víkingur/Reynir tapaði eftir hörkuleik fyrsta leiknum sínum á tímabilinu 36-41.  

 Í næsta leik kepptu þeir við Val og unnu þá með glæsibrag 78-28.  Leikurinn gegn Þór Akuryeri fór 46-38 fyrir Víking/Reyni. Þegar allir leikir riðilsins höfðu verið spilaðir voru þrjú lið jöfn að stigum Grindavík, Þór Akureyri og Víkingur/Reynir en Þór Akureyri komst upp úr riðlunum vegan innbyrðisviðureigna en þeir unnu Grindavík með 17 stigum.  Á þessu móti spiluðu krakkarnir í nýjum búningum sem Steinunn SH styrkti.

Frétt úr Jökli 9.2.2012

12.02.2012 10:16

Snæfell vann Val á Hlíðarenda

Snæfell færist nær úrslitakeppnissæti
11 02 2012 | 19:45

Snæfell færist nær úrslitakeppnissæti

Snæfell færðist nær sæti í úrslitakeppninni með sigri á Val að Hlíðarenda í dag.  Snæfell hefur nú 22 stig í 5 sæti deildarinnar, aðeins 2 stigum á eftir KR sem tapaði óvænt fyrir Hamri í dag.  Snæfell var vel að sigrinum komin í dag en þær leiddu leikinn frá upphafi og stungu Val af í þriðja leikhluta og náðu mest 21 stigs forskoti og sem reyndist Val of mikið þegar þær náðu góðu áhlaupi í fjórða leikhluta.  Snæfell vann á endanum 6 stiga sigur, 82-88.  
Lið Snæfells spilaði vel sem heild í dag og skoruðu 5 leikmenn þess 12 stig eða meira.  Þar var Jordan Lee Murphree stigahæst með 22 stig og 9 fráköst.  Næstar voru Kieraah Marlow með 21 stig, 10 fráköst og 7 stoðsendingar og Hildur Sigurðardóttir með 16 stig og 7 fráköst.  Í liði Vals var Melissa Lechlitner stigahæst með 29 stig en næstar voru Lacey Simpson með 13 stig og 15 fráköst og María  Ben Erlingsdóttir með 12 stig.

Leikurinn fór mjög fjörlega af stað og gestirnir náðu strax frumkvæðinu.  Strax eftir 2 mínútur af leik hafði Snæfell yfir 5-11 og leikurinn fór hratt af stað.  Snæfell hélt uppteknum hætti og höfðu 5-8 stiga forskot framan af fyrsta leikhluta. Snæfell náði mest 8 stiga forskoti í stöðunni 14-22 en þá fóru hlutirnar að breytast. Þegar leið á leikhlutan fóru Valsstúlkur að pressa Snæfell hátt og virtust með því komast smám saman aftur inní leikinn.  Snæfell hafði svo yfir með einu stigi þegar fyrsta leikhluta var lokið, 29-30.  

 

Snæfell skoraði fyrstu 5 stig annars leikhluta og höfðu því 6 stiga forskot strax eftir eina og hálfa mínútu.  Valur svaraði því fljótt og höfðu jafnað leikinn í stöðunni 37-37 þegar rúmlega þrjár mínútur voru liðnar.  Varnarleikur liðanna var allt annar en í fyrsta leikhluta og skotin voru að geiga á báðum endum vallarins.  Snæfell tók þá aftur á skarið og þegar þrjár og hálfa mínútur voru eftir tók Ágúst Björgvinsson leikhlé fyrir Val í stöðunni 39-45.  Snæfell hafði góð tök á leiknum og boltinn ætlaði ekki ofaní fyrir Valsstúlkur.  Munurinn á liðunum var kominn upp í 11 stig þegar ein og hálf mínúta var eftir af leikhlutanum, 41-52.  Snæfell hélt þeim mun það sem eftir var fyrri hálfleiks og leiddu með 9 stigum, 45-54.  

 

Stigahæst í liði Snæfells í hálfleik var Hildur Sigurðardóttir með 14 stig en næstar voru Kieraah  Marlow með 10 stig, 6 frákost og 5 stoðsendingar og Helga Hjördís Björgvinsdóttir með 10 stig.  Í liði Vals var Melissa Lechlitner yfirburðarmanneskja með 16 stig en næstar voru María Ben Erlingsdóttir með 8 stig og Lacey Simpson með 7 stig og 8 fráköst.  

 

Snæfell bætti enn í forskotið á upphafsmínútum þriðja leikhluta og höfðu náð 13 stiga forskoti í stöðunni 48-61 eftir tvær mínútur.  Sóknarleikur Vals var ekki að skila þeim miklu og Snæfell gekk á lagið.  Þegar leikhlutinn var hálfnaður tók Ágúst Björgvinsson leikhlé fyrir Val en forskot gestana var þá komið í 14 stig, 54-68.   Kieraah Marlow og Jordan Lee Murphree fóru fyrir Snæfellsliðinu sem keyrði hreinlega yfir Val í leikhlutanum.  Þegar 2 mínútur voru eftir var munurinn kominn upp í 19 stig, 54-73.  Þegar einn leikhluti var eftir af leiknum höfðu gestirnir 17 stiga forskot, 58-75, og útlitið ekki bjart fyrir Valsstúlkur.  

 

Valur náði smám saman að minnka muninn í fjórða leikhluta.  Björg Guðrún Einarsdóttir lenti í því að renna á gólfinu og lenti illa.  Hún var borin útaf og kom ekki meira við sögu í leiknum.  Þegar leikhlutinn var hálfnaður hafði Valur náð forskoti Snæfells niður í 13 stig og aggressífur varnarleikur Vals var farinn að skila sér.  Valur gerði allt sem þær gátu til þess að koma sér aftur inní leikinn en munurinn var hreinlega of mikill.  Þegar ein mínúta var eftir af leiknum var munurinn kominn niður í 8 stig, 80-88.  Pressuvörn Vals skilaði þeim svo aftur inní leikinn þegar 38 sekúndur voru af leiknum.  Þórunn Bjarnadóttir stal þá boltanum og Valur fékk auðvelda körfu, 82-88.  Ingi þór Steinþórsson tók þá leikhlé fyrir Snæfell.  Þessar 38 sekúndur voru hins vegar fljótar að hverfa því Snæfell tókst að spila seinustu sóknina og klára leikinn.  

 

gisli@karfan.is


12.02.2012 10:13

Póstmót Breiðabliks


Tíu drengir mættu til leiks á Póstmót Breiðabliks í Kópavogi undir minni leiðsögn.

Þeir Ari, Jóel, Valdimar, Kristófer Kort og Benjamín voru í öðru liðinu sem spiluðu á velli 2 og Ellert, Samúel, Valdimar Ólafs, Einar og Viktor í hinu liðinu á velli 3.

 

Spilað var við KR og Grindavík á velli 2, Hauka, Keflavík og Grindavík á velli 3. Strákarnir á velli 2 byrjuðu af miklum krafti án tvíburana (Kristófers og Benjamíns) sem komu með ''stjörnuinnkomu'' örlítið of seint vegna tæknilegra örðugleika.

Á velli 3 voru strákarnir í miklum hlaupaham og skoruðu alveg aragrúa af körfum úr hraðaupphlaupum sem hin liðinn áttu engin svör við.

 

Allir strákarnir stóðu sig eins og hetjur og sást vel að miklar framfarir hafa átt sér stað frá því í haust þegar lagt var af stað eftir sumarfrí.

 

-Óli Torfa-

HSH

Nafn:

Héraðssamband Snæfellsnes og Hnappadalssýslu

Farsími:

865-0294

Afmælisdagur:

24 september 1922

Heimilisfang:

Sólvellir 3. 350 Grundarfirði

Staðsetning:

Snæfellsnes

Heimasími:

436-1635

Önnur vefsíða:

umfi.is

Kennitala:

620169-5289

Bankanúmer:

0191-15-370322

Tenglar

Flettingar í dag: 689
Gestir í dag: 51
Flettingar í gær: 471
Gestir í gær: 114
Samtals flettingar: 3290315
Samtals gestir: 253478
Tölur uppfærðar: 16.1.2018 17:28:50
Flettingar í dag: 689
Gestir í dag: 51
Flettingar í gær: 471
Gestir í gær: 114
Samtals flettingar: 3290315
Samtals gestir: 253478
Tölur uppfærðar: 16.1.2018 17:28:50